鍾鎮濤（阿B）自宣布破產後，現在他每月的收入都要悉數交予破產管理主任還債，只會批留生活費，但阿B仍不停到處登台及拍戲，更積極再出碟。工作雖然辛苦，但阿B表示人要學會未雨綢繆，好為將來留下一個美好紀錄，畢竟，人生還是要繼續。
鍾鎮濤去年簽約滾石後，事隔七年再出碟，其最新國語大碟《男人》於昨日推出，今次阿B找來台灣著名製作人小蟲擔任監製，除了首次與管弦樂團合作新曲外，還因小蟲而開始留意星座。
阿B說：「小蟲同我一樣係雙魚座，佢好揀人合作，水瓶、巨蟹都好，雙子同白羊免問，我聽過有段時間，滾石都信星座，雙子、白羊同處女座嘅人唔請嘅，不過唔知真定假？」
問阿B本人是否相信星座，他說：「我諗起好多人所屬嘅星座，都覺得幾啱㗎，𠵱家我都會留意吓，拍住唔啱嘅人好大鑊㗎，好似我女友係天秤座，好幫到我。最friend嘅係巨蟹，好似梁朝偉。不過雙子座嘅女人，就唔好行埋嚟，（按：阿B前妻章小蕙乃雙子座）不過做朋友冇所謂。」問阿B以後是否會遵照星座來揀朋友或拍檔，他說：「都會留意吓囉，唔通導演係雙子就唔做咩，要搵食嘛。」
阿B事隔七年後才再出碟，他解釋說：「其實之前有唱片公司提議我出新歌加精選，不過我冇心情咁做。今次同LA嘅管弦樂團合作，係專攻二十五歲以上市場，嗰批年紀嘅人有句口頭襌：『𠵱家啲歌唔好聽』，梗係啦，𠵱家專做K歌，乜都電腦電子化，毫無音樂感。𠵱家歌手出碟幾乎冇人唔用電腦校過，所以個個人都做得歌星，唔係點會走音都開演唱會？」
提到時下歌手缺乏唱得之人，問阿B覺得哪位歌手走音最嚴重，他說：「人哋重要搵食，畀啲空間人哋進步啦。不過可以講吓我好欣賞陳奕迅同鄭中基，佢兩個好有音樂感，喺音樂領域上好聰明又好叻，女仔就鍾意鄭秀文，俾個女影響。」
問阿B可有期望在樂壇得獎，他表示：「有獎畀我梗係要，但唔會爭，我做嘢都唔係為攞獎而做，容乜易坐監㗎？我都唔恨。」
阿B現時已完成年多的破產生涯，現在他每月收入都要悉數交予破產管理主任作為還債之用，破產管理署只會批留生活費，但他仍不停到處登台及拍戲，問阿B何以如此拼搏，他說：「其實𠵱家做嘢，都係為自己人生經歷留個好嘅紀錄，我想做張過咗十年後，都唔過時嘅碟。要未雨綢繆，冇可能停晒所有嘢，等破產完先做，到時都唔知重有冇得做。」
