早前曾在港掀起一陣歐洲小車熱潮嘅福士Polo，最近廠方就宣布為其推出走跑車化路線嘅GT版本，務求吸引更多車迷注意。
全新福士PoloGT，不但保留有原來嘅雙門及四門版，供用家選擇之餘，外形亦看似與原有型號相近；但細心留意下，不難察覺新車換裝上四輪16吋跑車合金胎軨，連205/45R16輪胎組合，響加有GT徽章嘅鬼面罩等組合襯托下，一派小跑車形象可謂表露無遺；至於車廂方面，廠方特別為其換裝上前排跑車座椅、銀白面板裝飾、真皮軚環及波棍的等等，比原有標準版來得更具瞄頭。
引擎配搭方面，則有電油及柴油引擎各三台供用家選擇，其中一台1.9公升TDI柴油Turbo引擎，馬力輸出更高達130匹㖭！除此之外，新車又換裝上將車高Low低15mm嘅跑車化懸掛組合，從而令操控表現更上一層樓呢！未知身處香港嘅車迷，有冇機會與之見面呢？