立法會班議員有鋪「毒癮」，但凡聽見邊處地方爆出病毒，邊種食物累事，佢哋就會出動，追住啲「病毒源頭」嚟做宣傳。上年四月沙士高峯期，淘大居民搬入位於港島嘅鯉魚門度假村隔離，搞到同名嘅鯉魚門海鮮食肆都冇人敢去。當時立法會七黨聯席就想出救市行動，約埋成班議員去鯉魚門大排筵席，叫市民唔使驚。
呢輪禽流感當道，香港人唔敢食雞，於是班議員再次出動。今次由飛天朱、麥國風加上阿石，組成食雞三人組，事發地點係灣仔譚臣道老字號悅香飯店。悅香係以白切雞起家嘅，六十年代不知風靡幾多雞迷。
講番班議員，佢哋叫咗一隻白切雞，幾條青菜，一人一碗米粉。只見負責請客嘅飛天朱一口咬落隻雞度，都未吞落肚，就大讚好食，話咁大個人都未食過咁好食嘅雞。八方就擔心，香港一年到晚咁多疫症，一陣又霍亂，一陣又諾沃克，班議員唔知食得幾多樣，霍亂可以食海鮮救市，諾沃克可以打邊爐救市，咁登革熱又可以食乜呢？
（圖）朱幼麟（中）請麥國風（左）同劉千石（右）去灣仔悅香食雞，未吞落肚就大讚好食。 李家皓攝
傳真︰2623-9278
電郵︰