梁國雄長毛早前終於一償夙願，去到南美古巴追尋偶像革命英雄哲古華拉事迹，之後重粉墨登場做話劇扮演哲古華拉，噚日佢喺電台節目講述感受，話哲古華拉係個悲觀英雄，佢自己就係一齣喜劇，唔少香港人視佢為民主英雄，係基於「移情作用」，「小丑受人歡迎，係因為大家都想得到歡樂，我只係做咗啲大部份香港人想做，但做唔出嘅事，大家只係將感情投射喺我身上。」
除咗去南美，長毛舊年另一重要行程係獲准返大陸為母奔喪，但原來此行有少少唔愉快，就係長毛同已經退休嘅共產黨幹部舅父炒大鑊，兩人爭拗社會主義、共產主義問題。
長毛話：「我細個時係呢個舅父向我灌輸共產主義、社會主義，估唔到今日要同佢嗌交。」大陸改革開放廿幾年，重有幾多黨員信奉馬列毛呢？長毛應該心中有數啦。
傳真︰2623-9278
電郵︰