阿B去年中送兒子鍾嘉浚到美國軍校留學，至去年聖誕才返港度假，阿B自言兒子出生後，首次與他分離如此長時間，他說：「好掛住個仔，佢聖誕節返嚟，我就日日乜都唔做，去邊都要同佢一齊，應酬都帶埋佢去，個仔大過咗好多，開始懂事。」
何以要兒子入讀軍校，阿B說：「唔係我決定晒嘅，不過佢讀嘅軍校唔係好辛苦嗰啲，佢鍾意到不得了，成日攞住支棍操兵，喺架車度都要操，佢儍更更咁成日做埋啲無聊嘢，佢有一次喺銅鑼灣大街見到架DreamCar，會突然大聲叫：『BMW！』搞到成條街啲人都望住佢。」
阿B女兒鍾嘉湄現正學彈鋼琴，還開始表露其演藝細胞，阿B說：「個女係我嘅開心果，佢以前唔多敢講嘢，𠵱家成日講唔停，成個八妹仔咁好可愛，佢重會睇完鄭秀文嘅戲後，搵人同佢對戲，好好笑。」
問阿B可會讓女兒踏足娛樂圈，他謂：「只要唔傷天害理，做乜我都唔反對。」
早前阿B前妻章小蕙以SM造型拍新戲，欲問阿B怕不怕對子女造成影響，但其唱片公司事先聲明不能詢問有關章小蕙的問題，故只能旁敲側擊，當談到阿B的新碟形象，若唱片封面以SM造型示人，定當大有噱頭，阿B聞言即大笑說：「俾人用咗，費事抄橋啦，我怕我阿媽心臟病呀。」
問到章小蕙的SM造型可會對子女造成影響，阿B即回復嚴肅說：「每個人有選擇自己路向嘅自由，唔好針對人嚟講，條街都有好多不良刊物啦，我只可以講，作為父母，我有責任教子女分辨是非。」
採訪：蔡如育 攝影：仇志德
首飾提供：CrossHeaven
