三菱LancerEvo.ⅧMR矚目登場

備受車迷注目嘅三菱LancerEvo.ⅧMR，廠方終正式將之推出；新車不但外形及車廂鋪排經過悉心改良，以吸引車迷注意外，輸出更強橫嘅2.0公升Turbo偈，同埋經過改良嘅底盤結構，亦成為新車賣點之一。不如𠵱家一齊嚟先睹為快，睇睇新車有何吸引力喇！

內外狠辣富跑格
與其他LancerEvo.系列跑車一樣，全新LancerEvo.ⅧMR無論係車外或車內，都予人跑味十足嘅個性；其中一組黑底頭燈、特製徽章、四輪專用BBS輕量化跑車合金胎軨，加埋專有車身色調，全都能將呢個特點表露無遺；至於車廂方面，不但換裝上新配搭嘅Recaro跑車桶椅外，另外把持感十足嘅Momo跑車軚環，亦屬標準配搭之列，試問身為高性能跑車Fans嘅你，又點可以抗拒呢份誘惑呢？

引擎扭力輸出激增
雖然全新LancerEvo.ⅧMR依舊以一台編號4G63嘅2.0公升直4DOHCTurbo偈作動力核心，馬力輸出數值與舊有型號相近，但中低轉扭力輸出較前來得充裕及線性外，數值更達至40.8kgm/3500rpm，加上改用輕量化鋁質物料模鑄嘅車身，從而令車子起步及加速表現，要比原有型號來得更強勁外，廠方更特別改良引擎嘅冷卻效能，以求車子可有更佳表現。
與此同時，新車又加入咗專用嘅Bilstein跑車懸掛，除可帶來更佳嘅吸震表現外，匹配埋多套電子系統，如ACD、SuperAYC、AWC等及恒式四驅系統輔助，無論喺On-road或Off-road嘅路面行車，都有出眾嘅循迹表現。