寫過兩篇車公廟求籤之後；竟有朋友當左丁山係解籤師，叫我解籤，為之暈得一陣陣。呢樣嘢，好有心理影響，當然要盡量避免。適逢其會，今年到車公廟上香打鼓轉風車求籤之前，喺沙田第一城報攤買報紙；竟然見到一本《車公廟靈籤》，內載所有籤文（一至九十六籤）及作者嘅解說，每本售四十八元：翻閱一篇之後，覺得簡單易明，立即買下。到車公廟求籤之後，買籤要五蚊一條，買呢本書真係抵到爛也。
求得下籤，不妨參照泰國人、日本人嘅處理方法。左丁山到過泰國北部古城素可泰（Sukhothai），遊覽當地著名佛廟，自不然入鄉隨俗求番支籤，一位來自上海嘅女團友求得下籤，面都青晒，泰國人教佢手執下籤在佛像前三拜之後，焚籤了事（寺內有一個鐵盒，專供焚籤之用），原來有好多人焚籤嘅。呢位女團友後來去到當地機場坐內陸機返曼谷，發覺唔見咗護照，幾乎喊出聲，猛話係求得下籤嘅結果。哈，導遊竟然係警察出身，立即打電話畀素可泰警察局，請舊同事派警察到所居酒店房間搜查，一小時後，在房間內櫃桶搵到，立即透過警察渠道，送去曼谷畀番呢位女團友。此乃不幸中之大幸，焚毀下籤有此結果，你話啱啱撞着剛剛也好，夠運也好，講乜都得。東京淺草雷門觀音寺亦有求籤，唔少日本人將求得嘅下籤綁在廟外一條柱上。香港嘅廟宇冇此設備，似乎應該仿效泰國式或者日本式，等求到下籤嘅善信安心。