上個禮拜三臨尾市時，最後兩分鐘國企股大插水，表面係話有個對沖基金離場唔玩國企股，但實際係乜原因，相信只有圍內人先知。
即使唔係因為有大戶離場，國企股呢排嘅表現都唔係好得，不過就一啲都唔影響班企業高層批股嘅意欲，伏勝喺過去一個禮拜，日日收唔少關於批股嘅消息。根據做企業財務嘅朋友講，市場已經有好幾隻股仔同埋國企股等機會批股，如果個市一生番，就即刻出手。伏勝心諗，雖然個市嘅資金算幾多，尤其喺咁牛皮嘅市況下仍然有170億成交，但呢排有啲股份批完股後，都升唔番上去批股價樓上，所以各位見到啲股仔急升，有炒起批股嫌疑嘅話，就要特別小心。
有個分析員朋友講，話國內有意開放電訊通話收費，伏勝聽到之後就意識到又會有另一場腥風血雨減價戰出現，尤其喺國內移動通訊市場，兩隻移動電訊股喺過去幾回合打到難分難解，一時又出單向收費，一時又推出CDMA等「絕招」，拳拳到肉，招招攞命，幸好每次雙方鬥到血流披面時，負責做裁判嘅信息產業部都出嚟打鐘終止賽事，先至冇出事。
雖然今次雙方高層明言唔再搞減價戰，但根據過往經驗，千祈唔好信到十足。個朋友就同伏勝講，與其心驚膽顫去買兩隻國內移動電訊股，不如轉去買隻做固網嘅中電信（728），皆因即使開放電訊通話收費，對佢哋都唔會有乜壞影響，再加埋隻中電信跌番落去50日線後，支持唔曳，而且冇乜太大沽壓，應該可以有機會跑出，所以叫放心去馬，重話喺短期內有機會見番3.2元水平。
伏勝