話咁快又到一年一度甜甜蜜蜜嘅情人節喇，諗到點同意中人慶祝未？不論你是否已心有所屬，又或定下追求目標，甚至明戀、暗戀、單戀、癡戀，都可參考吓歷來經典愛情片，向各大𠝹女高手借橋偷師，就算唔學番一招半式冧人，都可約埋意中人齊齊重溫呢堆冧片，效果一樣咁顯著！
記者：徐影龍
經典愛情片如恒河沙數，要揀最好嘅片出嚟當然有難度，以下介紹電影絕對主觀，雖然未必全屬流芳百世嘅經典，不過戲裏主角均身懷絕技，冧女招數可謂百花齊放、層出不窮，能否從中領悟而有所得着，就要睇你造化喇。
呢套擺到明係文藝到痹嘅愛情片，所以當初喺香港上映時，並未引起太大注意，就算有朱孝天搭梁詠琪等偶像派擔演，票房都只係一般過一般。不過近期推出既VCD/DVD，就食正嚟緊嘅情人節Timing，相信銷量會有番咁上下。講番套戲，時代背景為1981年嘅中國，主角頻小佳（梁詠琪飾）一次偶然機會下，攞咗學校入面興趣班嘅無線電機，無意中居然聯上2003年嘅聞家輝（朱孝天飾），兩人在空氣中相遇，談天說地，漸生情愫，好有《緣份的天空》Feel，而結局亦頗為出人意表，兩人之關係原來大有來頭。其實大家從中學到嘅，就係要增進二人關係，並非而要日日見面嘅，得閒多啲傾吓電話，反而有種「這麼近，那麼遠」嘅感覺。
另一套以喜劇包裝嘅愛情片，不過笑位全部都係講野蠻女點樣恰盡老實人。戲中後段提到嘅「時空蛋」及結尾相睇一幕，的確令人深深感到緣份嘅奇妙，不過要活用喺現實中，不妨學車太賢咁，當住一百幾十人面前，送花畀個女仔，最好有咁矚目得咁矚目，若加埋慢步行埋去，則效果更佳。
經典愛情片十居其九都有首勁Hit冧歌，呢套紅足二十年嘅動畫，今時今日聽番嗰首《可有記起愛》，仍然覺得感動。男主角一條輝唔要萬人迷明美，寧要軍官美沙，最關鍵就係佢哋喺荒廢咗嘅地球上，煮咗一餐飯仔，一撻即着、墮入愛河。笨手笨腳嘅男士們，識做喇？
阿Sa技驚四座之作，戲內雖扮演富家女，可惜身患癌症，代辦身後事嘅陳奕迅由憐生愛，細心照顧呵護，如雪糕混藥餵阿Sa食等，卒之阿Sa漸見起色，不幸係輪到陳奕迅身染惡疾，最後剩下阿Sa積極面對生活。全片非常感人，喊位甚多，加埋首聽親都喊嘅《活着多好》，主觀地認為比劉青雲嘅《不了情》更感人。
要數愛情經典又點少得占士金馬倫呢隻船？當年《鐵達尼號》瘋魔全球，幾乎係女仔都睇到眼濕濕離場，絕對威力無窮。戲中講述富家女不理家人反對，傾情於窮小子，雖然係老土到痹，不過最後喺沉船意外發生後，反而因男方無私奉獻而逃生成功。嘩，冰天雪地重要浸喺水入面，真係勇氣可嘉，雖然男士們未必要浸雪水表現紳士風度，不過家陣香港咁凍，適當時候除件衫畀女方，都包保暖到入心喇。
呢個奇雲高士拿絕對係至激派掌門人，做天后保鑣過份投入，一抱傾情後再加瞓身擋子彈，血如泉湧瞓醫院，最後先可成功𠝹到僱主天娜端納咋。從中學到嘅，並非因「見紅」而成功，而係當中嗰份大無畏精神，女方有難時，正好係堂堂大男人挺身而出時，成功護花肯定勁加你分。
愛情片並非事必要驚天動地、可歌可泣嘅，《孤男寡女》就係成功以喜劇包裝嘅經典愛情片。全片表達手法輕鬆得嚟，笑位亦好密集，唔會睇到喊苦喊忽。就算情敵年輕有為、過億身家、靚仔過人？唔使驚，學戲裏嘅劉華咁，舉起大大個牌示愛，將尊嚴拋諸腦後，勁厚面皮，包你事半功倍。
資料提供：美輪鐳射
電話：25631327
地址：北角和富中心家居庭G19A舖