長期試車：試盡萬事得Mazda62.3一星期<br>活現房跑車個性

長期試車：試盡萬事得Mazda62.3一星期
活現房跑車個性

於較早前推出嘅全新萬事得Mazda6車系，憑着獨特造型及出眾性能表現，而成為全城車迷追捧對象；為咗睇吓點解佢會咁受歡迎，故此我哋特別向代理借咗一部Mazda62.3四門版作長期測試，究竟結果係點呢？大家不妨一齊嚟睇吓！

記者、攝影：鄭達基　
協力：畢明

日本萬事得車廠近年勵精圖治，不斷研製多款能迎合市場需要嘅新車；其中打響頭炮嘅，就係走中型房跑車路線嘅Mazda6。此車響世界各地皆受車迷歡迎，而且重奪得多個國際性車壇獎項㖭！

動感造型加包圍型到盡
取車當日，從代理市場部大員手上接過車匙後，便急不及待圍繞車子走咗一個圈，睇吓佢究竟有何吸引力，惹來咁多年輕車迷垂青。
由於代理所提供嘅測試用車，係加有一套原廠跑車化包圍配件，當中包括前擾流器、車身兩側裙腳及車尾裙腳擾流器（需另加$9,075，已連稅），故此喺原有跑車化鬼面罩，以及四輪17吋跑車合金胎軨襯托下，一陣陣誘人嘅跑車韻味油然而生，實在令人不禁對其大叫一聲：「你好型呀！」



跑車化座艙鋪排好誘人
Mazda6嘅車廂配搭，亦係佢將筆者深深咁吸引住嘅地方，皆因佢除咗備有全黑色高級真皮座椅，襯以透出紅光及以鈦金屬鑲嵌嘅中控台，嗰種懾人嘅跑車魅力，實在叫人難以抗拒，加上闊落車廂空間，就算坐滿乘客都不覺擠擁，與筆者一齊「測試」嘅朋友及同事，亦有相同感受呢！
車上設備配搭又見齊全，除電窗及電天窗外，重有6碟CD連MD音響，以及備有LifeBreath空氣過濾器嘅電子恒溫冷氣等配備；但略嫌各設備嘅控制鍵，於中控台上被編排得略為密麻麻，對首次接觸嘅用家嚟講，一定要慢慢熟習才可。安全設備方面，除備有多個安全氣袋及充氣簾幕組合外，堅固嘅車架結構，亦能為乘客若不幸遇上意外時，帶來充份嘅保護㗎！

■尾燈鋪排簡潔易讀，可給予尾隨車輛明確提示。

■四輪17吋跑車合金胎軨，除賣相獨特外，對增強行車循迹性亦有不少幫助。

■跑車化車廂鋪排，亦見惹人注目。

■中控台設備齊全，頂端更備有行車資料顯示及雜物匣。

■前排真皮仿桶形座椅乘坐妥貼舒適，駕駛席另備有電控調校。



跑車化座艙鋪排好誘人
Mazda6嘅車廂配搭，亦係佢將筆者深深咁吸引住嘅地方，皆因佢除咗備有全黑色高級真皮座椅，襯以透出紅光及以鈦金屬鑲嵌嘅中控台，嗰種懾人嘅跑車魅力，實在叫人難以抗拒，加上闊落車廂空間，就算坐滿乘客都不覺擠擁，與筆者一齊「測試」嘅朋友及同事，亦有相同感受呢！
車上設備配搭又見齊全，除電窗及電天窗外，重有6碟CD連MD音響，以及備有LifeBreath空氣過濾器嘅電子恒溫冷氣等配備；但略嫌各設備嘅控制鍵，於中控台上被編排得略為密麻麻，對首次接觸嘅用家嚟講，一定要慢慢熟習才可。安全設備方面，除備有多個安全氣袋及充氣簾幕組合外，堅固嘅車架結構，亦能為乘客若不幸遇上意外時，帶來充份嘅保護㗎！

■金屬跑車腳踏組合，可有防跣腳嘅功效。

■敞大電天窗組合，可給予乘客更多親近大自然嘅機會。



2.3公升偈配半自動波表現佳
響七天多達五百公里嘅測試路程中，遍及港九新界大嶼山，當中又不乏高速公路及陡斜嘅山道，絕能試出車子喺不同路面嘅表現；呢部用作測試嘅Mazda6，佢嗰台全鋁合金MZR2.3公升直4DOHC引擎，所畀到筆者嘅感覺係輸出強勁，配合埋一套可改以手波操控嘅4前速Activematic半自動波箱，起步加速反應明顯比其他同級對手，倍見敏捷有勁得多。
由於部車用上歐式底盤配搭，其中後輪更用上專利E-Type多連桿式扭力桿組合，喺四輪17吋輪胎及DSC等電子系統輔助下，路面循迹性不俗，就算要行走迂迴多彎嘅路段亦見輕鬆容易；另外，四輪高效能碟式制動，加上有ABS及EBD等電子系統輔助，制動表現亦予人收放自如之感呢！

■一套4前速半自動波配搭，可有操控手波車嘅快感。

■車迷Kendrew（左）及David（右）對Mazda6評價甚高，其中頗高嘅乘坐舒適性更成重點。



萬事得Mazda62.3四門版規格
引擎：2261cc直4DOHC
馬力：178ps/6500rpm
扭力：21.9kgm/4000rpm
傳動：4前速半自動波，前輪驅動
懸掛：（前）雙搖臂（後）多連桿
制動：（前）透氣碟（後）碟式（ABS）
輪胎：215/45R17
尺碼：4670×1780×1435mm
軸距：2675mm
新車售價：$219,000
查詢：萬事得汽車（28931112）

■鑲有銀白框邊嘅表板簡潔易讀，中間重有波檔顯示。

■尾廂空間夠晒大，擺多件行李都不成問題。

■一台2.3公升直4DOHC引擎，輸出充裕之餘，又見有運轉寧靜嘅特性。

■剛勁有度嘅底盤配搭，響一套出色嘅懸掛系統輔助下，行車循迹性之高予人信心。