近期禽流感肆虐，唔少人聞雞色變，不過拔萃男書院為鼓勵參加聽日「渣打馬拉松2004」十公里賽嘅三百幾個學生，噚日就煲咗一大煲雞腳湯（圖），畀佢哋喺賽前補一補，實行以形補形。
對於雞腳，其實校方都有啲顧忌，所以選用美國雪藏雞腳嚟㷛湯，唔用較鮮味嘅新鮮雞腳。不過唔使驚，大拔其中一個校董就係飲食界立法會議員張宇人，佢咁識飲識食，煲湯有佢教路實好味；但校方話張生冇幫到手，但廚師就加咗牛筋同牛骨一齊煲，所以大家噚日飲到唔停得口。
煲雞腳湯畀參加運動比賽嘅學生飲，係大拔嘅傳統。呢次班學生除咗可籌款畀受惠機構外，每一個學生跑畢全程，煤氣公司就會捐一千蚊畀學校作為擴校之用，即分分鐘大拔可以得到成三十萬蚊，所以梗係要令學生腳力十足。
傳真︰2623-9278
電郵︰