民政事務局局長何志平噚日喺會展舉行春節酒會，人頭湧湧。佢以廣東話、普通話同英文演講，都算好周到。兩位行政會議前女議員都有到，王䓪鳴春風滿面，老董未講完嘢，就着住件皮裘大衣趕下場；方黃吉雯捧足全場，重好風騷同八方講，目前全心全意搞國企來港上市，不談政治。
小吉亦以一身皮草look示人，佢阿姐一向小鳥依人咁款，但係其實係商界女強人，張卡片寫住「普華永道中國業務主席」，就知小吉𠵱家搵緊真銀。小吉話，舊年國壽招股就係佢間公司負責，嚟緊重有大把公司排住隊，非常好景。做國壽呢啲重量級嘅國企上市，小吉話學咗好多嘢。問佢對7.1遊行同11.23選舉點睇？佢話估唔到，冇乜嘢講，之但係冇再做行會成員，佢都笑自己條命好喎。
同場出現嘅余志穩最近周身唔得閒，皆因老董話要重視中產吖嘛，佢噚日同八方大談中產嘅定義。原來中產唔係以身家嚟界定，好多低下階層人士可能唔係好有錢，但會係中產；啲只係鍾意日日夜夜打麻雀嘅教師先生，就反而不入中產圍。
係唔係中產階級，余生話首先睇吓佢屋企有冇書，睇乜嘢雜誌；其次睇吓佢對政改有冇意見，點睇子女嘅教育同前途，個人有幾多儲蓄，點樣安排退休生活，會唔會想依靠政府呢？最後就要睇佢嘅嗜好。
（圖）小吉打扮一向嬌俏，𠵱家從商，造型更加雍容華貴。
傳真︰2623-9278
電郵︰