市況活躍，連積壓多年嘅貨尾盤，都陸續去貨，形勢大好之下，代理幾難得先𠱁到發展商趁節日搞貨尾優惠。
好似嚟緊嘅情人節，中原陳永傑率先搵到華懋吳崇武，為三個新界盤，青山公路傲庭峰、沙田碧濤花園及馬鞍山迎濤灣搞優惠，點知始料不及，俾發展商揼心口。
中記原先諗住，只送三份情侶攝影套餐畀買家，點知華懋嫌中原嘅優惠不切實際兼無誠意。佢話既然優惠針對情侶或者新婚買家，有乜理由限定買兩個單位？
於是即場施壓，要求中記放寬條件，兼加碼送贈，除咗所有買家都可享有優惠外，名額更加由三個增至十個。
幾經考慮後，中記接納。吳崇武都好識做，淨係畀中記嘅買家，可以喺情人節前以舊價（新價提高咗五巴仙）買貨尾，變相多啲客跟中記買樓，即使優惠變咗十三萬幾，超出預算兩倍幾都抵番。
以前市道好，地產代理豬籠入水，餐餐魚翅撈飯。
近排歷史重演，太子道西SkyGarden，為鞭策代理，實行送魚翅、鮑魚、燕窩等等做獎品。
三日內促成逾四宗成交，總銀碼又最高嗰位，可獲鑽石勞力士。促成最多宗數，可獲燕窩、鮑魚與魚翅各一斤。
做到最高呎價成交，獎品係SonyEricssonP900型號手電。總值四十萬。
個盤噚日有投資者垂青，用千四萬，連車位買入兩個高層A及B單位，每呎八千五元，創新高。
近嚟投資者掃貨，到達乜嘢都唔放過嘅地步，恒基張炳強話，就算只有三四厘嘅商舖，都照掃。
恒基元朗怡豐花園，就有投資者，用三百幾萬買咗個舖，回報僅三厘。就算未開賣嘅樓盤，基座商場同舖位，都有人出價。
另外，恒基喺市建局上環士丹頓街重建範圍內嘅住宅項目，向城規會要求獨立起。由於恒基早有重建規劃許可，如果唔畀佢起，唔公道，但畀佢起，又影響市建項目嘅完整性，所以城規正在翻查有冇先例，再作決定。
樓市愈升愈旺，地產代理行呢幾個月都大豐收，就算以往例淡嘅農曆新年檔期，生意反而重好㖭。
美聯主席黃建業噚日就話，一月份雖然有幾日新年假期，公司促成四千宗成交，包括一、二手住宅租售，同埋工商舖，單月生意額係六年嚟最好。
就算淨係計初一至初四，生意額都比舊年多三倍，與九七年樓市高峯期嘅情況看齊。
難怪黃老闆噚日喺周年晚會上，都揚言今年生意額要去到二十億。一月份成績已經咁好，全年目標當然要更遠大啦！
蘭西
電郵地址：
