系出名門嘅蘇菲亞哥普拉（SofiaCoppola），憑《迷失東京》成為首位角逐奧斯卡「最佳導演」嘅美國女性，佢亦帶挈男主角標梅利（BillMurray）鹹魚翻生，標叔唔止憑呢套片做咗今屆金球獎「喜劇?音樂劇組最佳男主角」，亦好有機做埋奧斯卡影帝。而《黐孖妹》嘅十九歲女主角施嘉莉祖安遜（ScarlettJohansson），表現亦令人眼前一亮。
下星期四上映嘅《迷失東京》，講標梅利扮演嘅荷李活過氣演員，獲貴賓式招待去到東京拍攝一隻酒嘅廣告。第一次去日本嘅佢，因為時差搞到晚晚失眠，喺酒店認識到由施嘉莉飾演嘅一個同樣受到失眠困擾嘅年輕少婦，之後佢哋重一齊去見識日本夜生活。
兩個年紀相差一截嘅人，同樣有另一半，但佢哋內心其實一樣好寂寞。不過兩個寂寞的心唔止玩到唔失眠，重不自覺產生咗感情。蘇菲亞話片中出現好多關於西洋人去到日本會失眠，佢哋唔能夠同日本人溝通而發生嘅笑料，都係由自己第一次去日本嘅經歷寫成。