港股周五大反彈，重返13300關口之上，成交亦開始回升。過去兩周天氣冷，港股大幅調整，下周預測天氣回暖，唔通港股會跟氣溫大幅回升？恒指噚日收報13309點，升278點，成交198.89億元。
上海銘源（233）噚日出現兩宗大手成交，涉及3000萬股，每股作價0.65元，結果全日造好，收報0.65元，升4.8%。公司月初以每股0.55元，配售1億股，集資5500萬元，其後股價在0.60元以上橫行，市場有傳言，該批貨轉咗畀大戶。黑客話，隻股在不久將來會開車，因為公司在國內收購醫療業務的交易快將成事。
里昂出報告唱好品質（243），但投資者不為所動，噚日里昂終於忍唔住出手掃貨，股價升3.7%，收2.825元，但成交只得1620萬元，好似重未有人跟，反而市值逾1800億元的新地（016）升得重勁，全日升4%至77元，新世界（017）更升7.2%至8.95元，恒隆地產（101）亦升3%，收11.75元。講起恒隆地產，要留意隻股嘅34.5億元可換股債券已經陸續被行使，至今已有7.35億元可換股債券要求轉為正股，每股行使價為9元，較噚日收市價折讓23%，呢批貨出籠都咪話唔震撼。
復地（2337）噚日首日掛牌，見到大摩全日入市力頂，收報2.525元，只較招股價高出7.5%，都算係近期表現較差的一隻國企新股。事實上，復地業務冇乜特色，即使有長實（001）及新地入股都難成賣點，市場上其他選擇仍多，為何要買一隻市價高於資產淨值的國內地產股呢？
阿 虎