近排好多股份配股後表現都麻麻，除咗上海世紀（755）因為配售新股，兼夾只係配畀一位仁兄，所以股價先至可以企得咁硬。雖然如此，噚日個市稍為反彈大啲，又聽到有兩間公司可能會進行批股。
小初真係唔多明白，唔通個市真係咁多水？
經紀陳話，市場傳聞搞批股嘅公司，包括搞展覽嘅筆克遠東（752），同埋做皮革加工生意嘅華聯國際（969），兩間公司上半年業績都受到沙士影響，所以業績表現唔多好睇。
筆克股份成交相當稀疏，但自從公司公布在2月17日公布全年業績後，開始有番幾十萬股成交一日，噚日股價上升3.45%，收0.45元。經紀陳話，除非有大隻佬肯出手，否則筆克要成功批股，真係要睇吓下半年業績會否強勁復甦，同埋股份成交要較為活躍先至有得諗。
至於華聯，經紀陳話人哋一早開始做緊嘢，股價在不足1個月內，由1.10元水平起步，噚日已經升到1.62元，係全年新高。
慕容小初