周渝民（仔仔）噚日中午十二點半左右到達香港機場，現場一早已經有百幾個女fans拉晒橫額等佢出閘，所以唱片公司亦派咗成十個保安保護佢。
仔仔一出閘時，嗰班fans就不停係咁叫佢，更有啲在場嘅遊客爬上條柱度影相睇熱鬧㖭，由於情況十分混亂，其中一個fans連鞋都迫甩咗。
之後仔仔就去到港台接受訪問，佢一落車就有幾十個fans衝咗入港台，搞到在場嘅保安要即時落大閘，趕番啲fans出去。仔仔喺接受訪問期間話希望可以做一個神經病人，而且想鄭秀文飾演一個護士幫佢做心理輔導。
另外，對於早排佢喺台灣畀人影到同許瑋倫蒲夜店，仔仔就解釋話當時有好多朋友一齊去，而且之後同佢去便利店嗰個並唔係許瑋倫，而係一個男性朋友。不過，仔仔就話呢一刻同對方冇發展機會，但第時嘅嘢就好難講，佢亦都覺得對方嘅品性好好，重有一種清新嘅感覺。
黃耀明同潘源良噚日去到商台接受《叱咤樂壇》訪問，原來佢兩個已經識咗廿幾年，所以今次阿潘創作嗰隻新唱片，明哥都有演唱其中一首歌。阿潘亦都大讚明哥喺香港樂壇可以一直堅持自己獨特嘅風格，係一個難得嘅歌手，而明哥亦都希望對方可以繼續做多啲好音樂。一人捧對方一句，都可以睇到佢哋幾老友啦！
陶喆呢排特別旺桃花，重俾一本雜誌選為「最佳情人」，佢噚日喺台灣澄清自己絕對唔係梅艷芳最後一個男朋友，佢重覺得寫呢單新聞嘅記者絕對係一個好好嘅編劇。另外，陶喆前排亦都俾人影到同喬安娜拍拖，不過佢就話對方只係佢嘅一位圈外朋友，佢亦都透露自己以前曾經親手做過一本相簿貼晒自己同女友嘅生活照送畀佢。
無綫藝員楊家洛不幸患咗肺癌，佢噚日如常返無綫拍《西廂奇緣》，佢話自己上年十一月已經知有癌症，但冇買保險，無綫份合約亦冇醫療保險，佢話自己唔擔心醫藥費，因為係睇政府醫生，做咗化療瘦咗十磅，胃口唔係幾好，不過佢仍然繼續食煙飲酒，因為做人最緊要開心，如果佢為自己身體着想，馮仁昭就勸佢戒煙同戒酒啦！
無綫電視總經理何定鈞噚日同記者會面，問到佢有關綜藝科裁員，佢話：「今次綜藝科大概裁咗二十幾個，我哋唔係因為裁員而裁員，始終綜藝科收視唔係太理想，反而我哋增加咗一百小時嘅劇集，同埋會外購多啲資訊性嘅節目去平衡番。」據知，部份設計部門主管亦已接獲大信封。
