自由黨創黨主席李鵬飛退出政壇笑傲江湖，佢噚日接受新城電台訪問時重提九八年選舉落敗嘅內幕。當年飛哥突然患上急性肝炎，喺北京病發後情況危殆，由於身份同時間敏感，佢想掩蓋患病消息，唔返香港就醫，初時諗住去美國，但因為情況危急，最後決定飛去新加坡，講番呢段經歷都一額汗，因為佢上飛機時已陷入昏迷狀態，好彩及時入到醫院先執番條命。
佢又講番十幾年前俾人扑穿頭，入急症室時幫佢聯針位醫生，今日已成為醫管局一哥，正是何兆煒。飛哥話自此佢每半年就做一次bodycheck，亦更珍惜生命，特別係師傅Sir鍾士元同佢講，點樣衡量政治人物功過呢，就係落台後冇權冇勢時都有朋友，咁就算成功嘞，飛哥話如果以此標準，佢都算有小小成就，除咗從政有收穫，佢亦透露一手「御妻術」，就係同老婆嗌交，老公一定要先講sorry，等老婆條氣順番，就乜都有得傾，否則硬碰硬就實冇好下場。
傳真︰2623-9278
電郵︰