緊貼芬佬線的經紀黃，向來炒股都好穩陣，但亦有老貓燒鬚之時，究竟今次佢衰在邊隻股票手上呢？竟然係忍者龜彩星（635），自從批股之後，股價一浪低於一浪，講起都心傷。
舊年多間歐資證券行大力推介彩星，話忍者龜在美國好賣得，股價一度炒高至接近1.80元。經紀黃見到咁多芬佬捧場，佢亦唔執輸跟進，點知隻股喺舊年11月中，在突然上升後就立即批股，之後股價愈跌愈深。彩星以先舊後新方式，配售1.3億股，每股作價1.60元，集資2.08億元。
雖然幫佢配售嘅歐資行噚日又出報告，估彩星2004年可賺1.63億元，並話彩星可見2.05元，但完全無助股價回穩。彩星噚日又跌多7%，收1.07元。
經紀黃話，市場傳聞芬佬在過年之後，突然唔鍾意工業股，所以彩星沽盤源源不絕，但股價跌得咁深，明顯同冇人維持秩序有關。
慕容小初