九龍一手豪宅近期勁熱銷，個個盤都競相大幅加價。好似嘉華長沙灣嘉珀山，甫一推出，火速賣咗一大截，重創出近年九龍分層豪宅新高價。與嘉珀山一街之隔嘅郝德傑道二號，都計劃趁市旺，蓄勢出擊。
個盤由信和、新世界同萬泰發展，由做製衣業起家嘅萬泰負責發展及銷售。個盤噚日定名「郝德傑山」，示範單位設係尖沙嘴中心，希望今個月有得睇。
由田氏家族掌管嘅萬泰，過去一直有收購豪宅，揸住收租唔賣。同人合作嘅項目，都係交由夥伴搞。今趟自己負責賣樓，好似係第一次，唔知有咩新招數？係咪會重有創意呢？
萬泰主席兼自由黨主席田北俊，近年熱心政治，舊年上京陳情一幕，令佢喺港人心目中聲望大增，假如親自上陣推介，話唔定可以大收旺場。
鷹君有幾重視旺角大型商業項目朗豪坊，睇佢哋籌備九個月，耗資千萬，喺灣仔鷹君中心做嘅五千呎預覽廳就知。
展館展出多個介紹朗豪坊嘅模型，開放兩個月嚟，已有二百幾個零售商戶參觀過。
每個零售商戶入展館參觀，先會睇段朗豪坊短片，然後，分別可以睇到朗豪坊位置圖、商場寫字樓同酒店外貌模型、重有商場剖面圖。鷹君助理董事李澄明話，每個模型造價過百萬。
鷹君更特別炮製樓書，介紹項目，總共印咗三千本，每本五百蚊。
何文田君頤峰管理，由新世界旗下富城物業負責。
呢家公司可以話係物業管理界老行尊，早於七十年代初期，已進駐擁有萬三戶嘅荔枝角美孚新邨。
話佢係全港首家管理大型屋苑嘅公司，一啲都無誇大，尤其當年罕有咁大規模嘅屋苑，無番咁上下管理經驗，都難以勝任。
不過，物業管理發展至今日，已經唔係鬥管理物業數量咁簡單，服務質素先至最緊要，尤其係豪宅。
近幾年由六星級酒店提供嘅禮賓司服務，開始引入豪宅，富城當然唔執輸，去年接管嘅中半山豪宅同上環新盤，增設禮賓司服務，即將入伙嘅君頤峰都唔例外。經驗豐富嘅富城，自然駕輕就熟。
最近成日聽到有不法之徒，開個假網站呃人，原來連發展商都遇到類似事件。
莊士項目經理陳偉光話，公司西半山莊士明德軒，未賣已經有好多客話有興趣。
大約一個禮拜前，有人通知區內細代理行，話可以入票認購，叫佢哋落十萬蚊本票或支票做定金，抬頭寫莊士××公司，重多番催促。
好在啲代理同客夠醒目，打莊士熱線電話查問，所以暫時無人受騙。
發展商見事態嚴重，於是嗱嗱臨去警署備案。同時問吓幾家大行，有冇收過類似電話，收到回覆話冇。發展商正想辦法搵個當事人出嚟。
同時鄭重咁同蘭西聲明，個盤完全由發展商自己賣樓，而且已經委託咗的近律師樓做唯一代收定金嘅律師樓，因此呼籲所有對呢個盤有興趣嘅買家要小心受騙，若有疑問可以直接搵番莊士㖭。
蘭西
電郵地址：
