3G電話推出後，反應好似幾熱烈，年輕朋友更加踴躍。賓架陳嘅姨甥女安妮立即有咗一部，賓架陳太太怪而問之：「安妮，乜咁闊佬，立即買咗一部呀？唔肉赤咩吓？阿媽送㗎？」安妮嫣然一笑：「媽咪邊會咁追上潮流，佢自己部手機係兩年前嘅舊款，重未捨得換。係保羅送畀我呀，佢自己亦買咗一部。保羅話以後我返工，佢返工，大家都可以睇到對方，等我唔使掛住佢喎。其實係佢唔見我一日，如隔三秋，想隨時睇住我至真！彼得、李察啱啱打電話嚟，佢哋又話想送部3G畀我㖭！」
陳太一諗，3G係好橋噃，立即打電話畀賓架陳：「喂，我要3G呀，同你一人一部，有照應。」賓架陳人老精，鬼老靈，一於耍太極，拖得就拖，問吓安妮先。原來保羅狂追安妮，雖然經常拖手仔，但彼得呀、安東尼呀、約瑟呀、李察呀亦都經常打電話畀安妮，保羅知啲唔知啲，好鬼緊張，所以一有3G就買兩部，送一部畀安妮，正是司馬昭之心，路人皆見，想話吼實安妮啫。
賓架陳與成班老友飲茶，個個話怕老婆透過3G，知道佢哋唔喺公司開緊公務會議，而係與靚女喺文華咖啡室開私人會議。經紀周話：「對老婆唔可以樣樣透明吖嘛？老夫老妻使乜咁煙韌！」賓架陳想落有道理，一於睇定啲，唔好應承老婆咁快先。手機響起，外甥來電：「舅父，我想買部3G送畀女朋友，可唔可以問你借住幾千銀？」