以戰爭動盪時代為背景嘅愛情電影《亂世情天》，搵咗妮歌潔曼（NicoleKidman）、祖迪羅（JudeLaw）同雲妮絲惠嘉（ReneeZellweger）三位當今最炙手可熱嘅巨星合作，負責執導嘅金像導演安東尼明格拉（AnthonyMinghella），擺明希望繼勇奪奧斯卡九項大獎嘅《別問我是誰》後，再創另一經典。
事實證明安東尼擅長拍攝呢類史詩式愛情故事，電影除咗描繪出被徵召參加美國內戰嘅艾民（祖迪羅飾）同愛達（妮歌潔曼飾）之間刻骨銘心嘅愛情之外，負傷嘅艾民由維珍尼亞州行返北卡羅萊納州ColdMountain嘅一段艱苦經歷，亦拍得一絲不苟。
當中安東尼為咗拍攝一場有數以千計士兵陣亡嘅戰役，特別叫工作人員依據史實，造出一個巨大嘅彈坑，而整個場面重係由逾千名演員上陣㖭。
不過《亂世情天》喺今年奧斯卡只獲七項提名，有知情人士話係因為妮歌嘅扮相太過光鮮，唔多似一個喺內戰中掙扎求存嘅女性，但該片嘅執行監製就有另一解釋，佢話因為部戲太遲上，如果十一月開畫就會多好多時間宣傳喎。
雖然呢部戲未能入圍奧斯卡最佳電影獎項，但係喺有「英國奧斯卡」之稱嘅英國電影大獎就有十三項提名，話唔定會攞番個尾彩呢！