憑電視劇《牽手》而喺內地廣為人認識嘅內地演員吳若甫，大前日凌晨喺北京一間酒吧同朋友飲完嘢之後，俾三個歹徒綁架，原因係吳若甫停泊喺酒吧前面嘅寶馬房車，引起歹徒垂涎。
最好笑係歹徒綁咗吳若甫之後，誤將吳若甫錯認係另一著名演員「乾隆」張鐵林。喺糾纏期間，一個歹徒向另一個歹徒講話：「這個人好像是演戲的張鐵林。」
好在內地公安迅速破案，吳若甫俾歹徒困咗喺間黑屋入面二十三個鐘，最後由公安成功解救。事後吳若甫話經過今次事件後，會更加珍惜生命，同時亦向勇敢嘅內地公安致敬。至於張鐵林，佢話對內地治安有信心，大家亦應該相信人民警察。馮仁昭覺得今次事件咁快得以解決，都算係不幸中之大幸囉！
出名健碩嘅韓國男星權相祐，最近俾導演唐季禮睇中，搵佢做改編自香港漫畫《龍虎門》嘅電影版男主角。韓國報章話，唐季禮同權相祐下個星期日會喺上海密斟，睇吓成唔成事。另外，聽講香港有個啤酒品牌，都睇中權相祐嘅身形，想搵佢拍會喺全世界播映嘅廣告，𠵱家只等權相祐應承。
內地最近又傳那英同男友高峰結婚，而且重有兩個版本，一個係佢哋會喺今年五月一日結婚，第二個係佢哋已經喺農曆新年期間，喺瀋陽老家秘密註冊結婚。
那英經紀人邱王黎寬噚日否認有咁嘅事，重話那英結婚一定會公告天下，而那英嘅家姐那辛就話唔知呢件事。不過若果那英真係結婚，我馮仁昭都戥佢高興！
名模Rosemary前晚身穿密實外套加短裙，出席喺銅鑼灣舉行嘅電影《迷失東京》首映禮，以往佢出席公開場合時，都愛以性感裝束示人，但可能前晚天氣轉冷，所以就着得異常密實，不過好彩佢都有着短裙，露出長腿，先至比較省鏡！
今日牛一嘅蔡一傑噚日去咗港台做訪問，佢話夜晚會同哥哥蔡一智同蘇志威等人去食飯慶祝。主持人講到梅艷芳死後有好多是非，傑仔話：「清者自清，我對得住個天、個地，同師傅梅艷芳，我問心無愧，唔使回應啦﹗」佢重呼籲要錫梅媽多啲，又話自己間唔中會打電話問候對方。
張震早排嚟香港時，猛同記者講話冇女朋友，等大家以為佢同台灣女友路嘉欣散咗。點知早排有人喺台北東豐街嘅火鍋店撞到張震同爸爸、哥哥一齊，同枱重有路嘉欣㖭！好明顯張震同路嘉欣感情重好好，不過當晚佢三父子就不停講電影，搞到路嘉欣插唔到嘴，馮仁昭覺得張震咁做就唔夠細心喇。
台灣藝人陳柏霖𠵱家喺昆明拍緊同Twins合作嘅《千機變2》，佢話第一次同成龍個仔陳祖明合作，重日日以武會友，所以混得好熟絡！不過陳柏霖就話自己嘅詠春拳厲害過對方，又話林鳳嬌成日提醒佢哋要着多件衫，唔好凍襯！
