恒指跌55點，幅度唔算大，銀行股比較硬淨，恒生（011）有1元進帳，滙豐（005）同中銀（2388）高低相差有限，埋單唔見1格。銀行係第一類派03年成績表股份，睇吓恒生走勢，估計銀行派完成績後，都會風光一吓，不妨酌量收集滙豐同中銀Call輪。
滙豐Call輪對象，計數買，有9156同9148。9156輪價75仙，4月到期，溢價0.9%，槓桿率15.9倍；9148昨日升咗5%，數據較9156略有不如，輪價67仙，溢價1.8%，槓桿率17.8倍，亦係4月夠鐘。想易買易賣，有較快波動，則揀交投勁活嘅9274，5月到期，輪價56仙，溢價3.4%，槓桿率21.3倍。
中銀Call輪，計數買，揀9115，5月到期，輪價3.25元，負溢價1.5%，槓桿率4.4倍，隻輪缺點係本身屬大價輪，唔係好多人落場炒，交投疏落，昨日只得30萬份易手。用嚟炒，則揀9218，9月夠鐘，輪價17.2仙，溢價8.7%，槓桿率8.3倍，單日有21球易手，炒輸咗想投降，唔怕冇對手。
個市若然唔多對辦，港燈（006）有可能逆市上升，諗吓相關Call輪。港燈Call輪9617相當低買，6月到期，輪價16.9仙，溢價0.3%，槓桿率18.7倍，就算睇錯，都輸有限。
章 盛