相信好多人同我大口羅拉一樣，從來冇諗過日本巨胸阿姐小池榮子，同曾經有「荷李活彭丹」之稱嘅莎瑪希恩（SalmaHayek）扯上關係。但係世事難料，榮子因為一次機緣之下同莎瑪見面，又睇過佢主演嘅《筆姬別戀》後，就愛上咗墨西哥。榮子重專登去嗰度拍寫真集，佢見到啲墨西哥阿伯嗰陣，亦好猴擒咁主動投懷送抱。
我大口羅拉先前講過，小池榮子帶埋女攝影師蜷川實花專登去墨西哥，為佢本散文集《PARAISO》拍寫真，而當本書到手嘅時候，我羅拉睇到親自寫散文嘅榮子，喺本書嘅序言提到因為同莎瑪希恩見面係命運嘅安排，令佢愛上墨西哥呢個地方，重決定要去墨西哥做下一本寫真嘅取景地。
雖然睇落唔覺本書嘅相有太多墨西哥特色，但榮子話能夠如願以償亦好開心，佢重講吓對當地嘅文化、歷史同名勝有幾熟，又教fans墨西哥文，認真厲害。
不過，榮子始終係一個見到男人就連阿爸姓乜都唔知嘅女人，佢喺書內亦大讚當地周街都係好handsome嘅猛男，影相時亦好開放咁對住啲墨西哥男人投懷送抱，連一把年紀嘅阿伯都唔放過，反而人哋個樣有啲尷尬囉！