港股繼續牛皮，恒指收報13030，跌55點，成交162.7億元。整體而言，港股可謂乏善足陳，得個悶字。阿虎喺度諗，蛋價升67%，究竟會對邊隻股份有利，結果就咁發咗半朝白日夢。
其實大市能在13000水平企穩，已算硬淨，噚日支持大市企穩，和黃（013）係其中之一，有消息話和黃除咗將固網出售及分拆印度電訊業上市外，重有好多骨水大動作，所以在有關活動完成之前，股價仍會反覆上升。
資本策略（497）主席朱耀銘出售29.36%股權畀電盈（008）董事鍾楚義。鍾氏一向擅長搞收購合併，同殼王Charles有密切關係，今次入股資本策略引起唔少市場人士憧憬。ｉ師傅話，據講鍾氏與朱氏二人關係密切，今次入股可能係有人玩交波仔遊戲，唔算好意外。今次資本策略由鍾氏揸正大旗，加上聯交所將會收緊借殼上市審批尺度，市場憧憬資本策略有動作跟尾，係正常的反應。消息宣布後，資本策略股價勁升54.3%至0.25元。
里昂出咗個報告，話品質國際（243）可能會沽售樂依文股權，每股2.20元，套現14億元，跟住重可能派發特別股息。不過品質股價未受呢個消息刺激而上升，反跌0.9%，收2.725元。據講品質等錢使，所以不時傳出配股消息，但就遲遲未能成事。沽售樂依文，亦係搵水方法之一，至於套現後會否派特別息及出手有幾慷慨，阿虎就唔樂觀。
復地（2337）招股獲480倍超購，市傳暗盤價升至2.70-2.80元，但近日國企股轉弱，相信散戶會急於出貨，幕後要維持秩序可能相當吃力。
阿 虎