歐倩怡早前到內地拍攝電視電影《冒牌大狀審死官》，日前她卻爆出在拍攝煞科戲中一場情挑內地男演員的鏡頭時，遭對方公然博懵，從後伸手拍其胸部。當時啞忍的歐倩怡向男友郭晉安提起此事時，男友即時嬲到眼火爆。
歐倩怡（Cindy）與張達明及苑瓊丹等人，早前在浙江橫店拍攝電視電影《冒牌大狀審死官》，日前Cindy接受本報電話訪問時，透露拍《冒》劇期間，遭一名在戲中飾演反派「顧財」的內地男演員當眾拍胸，令她非常生氣。
Cindy透露事發當天正在拍煞科戲，劇情講述她坐在「顧財」的大腿上以美人計情挑對方，本來排戲時仍相安無事，想不到在開機拍攝時，對方竟將從後抱住其腰肢的動作，改成拍她的胸部。Cindy重提此事時也不禁扯火說：「佢重連環拍咗我三下，但嗰下係電光石火間發生嘅事，我都唔知點反應，個腦中只係諗到導演未嗌cut機，都要繼續拍落去，當時我即刻用條絲巾遮一遮，搵隻手擋住個胸。」
Cindy續說：「我從來未試過發生呢啲事，我連佢叫乜名都唔知，平日嗌佢都係叫佢喺戲入面嘅角色名，但佢冇理由唔知女仔邊啲位唔掂得，重一而再、再而三咁做，之後我都黑晒面，一見到佢就即刻行開，好嬲呀！」
問Cindy為何不即場發難或向導演投訴？Cindy說：「一來係當時太突然，點諗到會俾人鹹豬手？同埋我份人好火爆，我一爆出嚟，大家一定收唔到工，我有同經理人講過呢件事，但最嬲嗰個都係安仔（郭晉安）。」
由於安仔當時也在橫店拍攝劇集《儍王闖天下》，事發前亦曾往探女友班，故該名鹹豬手男演員也認識安仔。而安仔得知女友受辱後，難免大發雷霆，Cindy說：「安仔嬲到眼火爆，佢問我點解當時唔反抗、唔識擋，但我唔知個男演員會咁，之前佢一路冇嘢，只係好鍾意主動圍埋嚟同人傾偈，又問我幾多歲，我同佢講已經有男朋友，嗰日真係唔知佢一時興起，抑或腰短身長摸到人哋嘅胳肋底對落啦！」
採訪：朱倬誼
