利嘉兒和無綫新人黎諾懿近日擔任婚紗公司代言人，首度披嫁衣的她拍宣傳照時展露甜美笑容。去年底利嘉兒與圈外男友因性格不合和平分手，雖然面對愛情失意，但事業卻得意，近期工作接踵而來。
去年底與圈外男友分手的利嘉兒，和黎諾懿近日成為現代經典專業婚紗攝影的代言人，日前他們拍攝多輯婚紗宣傳照，首次穿婚紗的利嘉兒表示辛苦都是值得的。
利嘉兒曾聽友人表示拍婚紗照要面對鏡頭不停笑，以至牙骱痠軟，她日前說：「好彩之前葉Sir（攝影師葉青霖）教我面對鏡頭嘅貼士，佢話只要諗住自己好幸福，就自然會真情流露咁笑，咁樣牙骱就冇咁痠軟，我覺得即將影結婚相嘅新人不妨參考一吓。」
談及與圈外男友和平分手，利嘉兒說：「我哋之間完全冇第三者，只係因為性格唔啱，拍拖時都試過多次離合，呢次大家傾過唔好再拖。喺呢段時間，大家暫時都唔會見面，希望將來都可以做番朋友。」
愛情失意，可是工作卻接踵而來，利嘉兒說：「曾經有相士同我講過，我嘅愛情同事業唔可以並存，過往幾次失戀後，我嘅事業都即刻有好發展，今次都唔例外，近排接咗好多廣告。」
至於將來會否為愛情犧牲事業，利嘉兒說：「呢啲嘢要隨緣，𠵱家身邊都有追求者，不過都係順其自然。」
採訪：比華利
