機迷講起忍者遊戲，絕對不能不提經歷多代嘅《忍者龍劍傳》，可謂忍者遊戲嘅始祖，最新一集《NINJAGAIDEN》亦鐵定會於2月26日正式推出，今集會由TECMO遊戲製作小組TeamNinja名製作人坂垣伴信領軍開發製作，故事以主角尋找秘傳龍劍復仇展開，係《忍傳》系列續篇之作，各位《忍傳》迷必定不容錯過。
記者：許福合
以往《忍傳》都係以橫向2D畫面居多，今次《NINJAGAIDEN》打到上XBOX，自然唔會再咁單調，用盡XBOX嘅3D機能，效果相當不俗，畫面可見設計得相當細緻。今次玩家將扮演嘅忍者「龍」造型可能似曾相識，其實即係《生死格鬥4》中嘅忍者角色。作為《忍傳》續篇，都係打打殺殺為主，不過鬥勇之餘亦都要鬥智，雖然設有詳細地圖，但遊戲內有唔少障礙會令玩家走錯路，甚至迷路，唔係見路就行咁簡單。
身為一名忍者，遊戲之初嘅武器只有刀同飛鏢，首先就要靈活運用呢兩種遠近距離武器，而用刀嘅時候變化亦較多，可使用連續技同招式，亦有貯氣招數，最勁係一招類似放電嘅必殺技，一招即可將全場敵人擊倒，非常好用！隨着遊戲進行會有唔少分支，作出唔同嘅選擇將會影響到所獲得嘅招式同武器，更會反過來影響劇情，變化多多。遊戲最難之處，係忍者嘅走動方式異於常人，新手喺跳躍方面較難掌握，要花多些時間熟習。
喜歡玩動作遊戲嘅機迷，最鍾意喺斬殺敵人時，對方會有啲「反應」，喺《NINJAGAIDEN》中，各位就可以過足癮，尤其將對方打倒後，再補多兩下，立即就會血花四濺，效果都幾逼真。但要彈嘅係遊戲內敵人出現方式就比較死板，當要走回頭路時，原先嘅敵人又會再次出現，可謂打不死，所以奉勸玩家睇住地圖行，免得因迷路而浪費體力，小記就因為呢個原因被擊倒多次。
遊戲類型：動作
對應機種：XBOX
遊玩人數：1人
推出日期：2月26日
行貨售價：$299
開發商：TECMO
(C)TECMO,LTD.TeamNINJA2003
XBOX（HK）查詢電話：800964215
《NINJAGAIDEN》內更包含有紅白機時代嘅《忍傳》一至三代，作為隱藏要素之一，不過小記試玩時就未能開啟有關選單，相信要通關指定關數，甚至爆機先玩到，對《忍傳》Fans，又多個珍藏嘅原因。《忍傳》係TECMO嘅經典動作遊戲，曾經喺多部主機上推出，如任天堂紅白機亦出咗好幾集，因為遊戲節奏感十足，玩起來流暢痛快，難度適中，所以當時頗受歡迎。
今次《蘋果》就聯同XBOX送你50個《SonicHeros》嘅證件袋，有興趣嘅讀者，只有手持今日嘅《爆機狂迷》，到以下地點即可免費換領一個，數量有限，換完即止。
GAMEhIT
電話：28344660
地址：灣仔東方188商場2樓247號舖
