西貢萬宜水庫對出破邊洲嘅百呎玄武岩石壁，遠足發燒友一向趨之若鶩，今日就帶大家登花山俯瞰破邊洲全相，之後再探「木棉洞」。靚景險中求，全程山路崎嶇不平，碎石散布，自問不夠腳骨力，看相片算了。
記者：陳震霖 攝影：陳鋾鈞
模特兒：Brian、Green（Space2）
起步點麥理浩徑白腊村村口，依領隊小李指示，向萬宜水庫東壩方向行5分鐘，右面出現1條隱閉「小徑」上花山，嚴格嚟講，地圖上根本唔存在呢條「小徑」，只不過係遠足發燒友慢慢行出嚟嘅所謂「山路」，「山路」絕對崎嶇，小心滑倒，帶支行山杖穩陣啲，着長袖衫，免被密麻麻嘅樹枝剌傷。
行至山腰，回望東壩，壩前有無數呈T形嘅混凝土防波石連環，互相緊扣組成1幅銅場鐵壁──「東圍堰」，勁有氣勢，唔怪得頂得住太平洋巨浪沖擊。
登上花山之顛，俯瞰破邊洲，唔講唔知，破邊洲同花山原本同屬一個山頭，小李解釋：「經過億萬年風雨侵蝕，花山裂開一忽，變成破邊洲。」望真，花山真係好似俾天神削走一邊咁，破邊洲右面石壁重有個尖長小水池，名堂好嬌俏，叫「貴妃池」，破邊洲面臨東海，風高浪急，叫貴妃嚟呢度出浴就慘咯，肯定凍到變雪條。
沿住小徑落花山，5分鐘路程到山腳「響石灘」，當海浪沖擊灘面石春，會發出類似燒炮仗嘅巨大響聲，加上石灘背後有1幅巨大玄武岩石牆引起迴音，身處石灘聽響石，感覺似喺戲院聽緊7.1杜比聲效，天然環迴立體聲，勁正！
灘後嗰幅玄武岩石牆，石柱呈摺叠扭曲狀，又點解？小李解釋：「幾百萬年前火山爆發，熔岩將岩石表面熔化，形成一條條筆直坑紋，坑紋慢慢冷卻呈半軟狀，重未完全凝固，地殼又突然變動，將原本筆直嘅坑紋扭曲，咪有𠵱家咁靚嘅景觀囉。」石灘上重會搵到一種有趣貝殼類動物「醋龜」，小李話：「我都唔識真正學名，如果搣甩『醋龜』塊掩，將塊掩放落醋，因為化學反應，塊掩會喺醋面滑嚟滑去，好過癮㗎！」
離開石灘，向白腊仔進發，全程崎嶇山路，間中重要穿越叢林，大約行40分鐘，眼前出現大片奶白色岩石群，附近山崗全屬火山岩，經多年風化，岩石軟化漸成奶白色，去到最後重會變成粉末泥土。Green同Brian勁貪玩，執石互擲，石頭因為密度低，一擲即散，通通變成泥沙。
再過到白腊灣，起初係一段石屎小徑，之後再走入叢林，發現成山都係一種暗白色嘅攀藤植物，小李再教一課：「呢啲叫薇甘菊，有朵叫『植物殺手』，靠風力傳播種子，迅速落地生根，繁殖能力極高，其他植物一旦俾薇甘菊攀附覆蓋，就會吸收唔到陽光同水分，捱唔到三兩日即時枯萎死亡，好恐怖㗎。」其他有趣嘅植物亦多的是，例如專食昆蟲嘅毛氈苔、貌似甘桔嘅山橙。
行行重行行，終見路標指示「木棉洞」方向，「木棉洞」高約25呎，深約40呎，潮退可入洞享受陰涼清風，小李話：「我入過去，大嗌重有好勁迴音㗎，可惜吖……」梗係可惜喇，啱啱撞正潮漲，無機會一嘗穿洞滋味，Brian唔忿氣，行上洞頂想近距離欣賞「木棉洞」，距離近就近，重好高好危險㖭，奉勸一句，遊山玩水安全第一，無謂樂極生悲。
原來去原路返，落白腊灣睇小破邊洲，今次唔同嘞，可以近距離欣賞呢個只有破邊洲二十份一體積嘅小洲。2個破邊洲生成餅印一樣，話係兩仔爺都無錯，至少小破邊洲都係因雨水沖蝕而脫離本身山群。
去程：鑽石山地鐵站乘92巴士（$5.5）入西貢市中心，轉的士（約$80）到麥理浩徑白腊村村口起步。
回程：經白腊村返回麥理浩徑，乘的士（約$85）回西貢市中心，再轉乘92巴士回鑽石山。
