對熱刺呢隊波，我求大俠真係無乜說話好講；睇佢哋前晚足總盃重賽，主場贏緊三球又打多人一個，都可以輸番三比四！真係要寫兩個「服」字，一個畀曼城，一個畀佢哋囉！
其實熱刺已經唔係第一次咁樣（其中佢哋嘅後衞李察士更係第三次，兩次喺熱刺，一次喺修咸頓），幾季前聯賽亦經試過半場贏曼聯三比○，後來反輸三比五！咁啱今次呢隊曼城又係嚟自曼徹斯特市，都咪話唔邪。
相信呢次除咗曼城球迷開心外，熱刺球迷嘅另一半都會同樣開心；事關球隊唔使踢二月十四日進行嘅第五圈對曼聯嘅賽事，熱刺球迷叠埋心水同HONEY過情人節都得嘞！
維杜卡早前返澳洲探望患心臟病的爸爸後，星期一經已歸隊向列斯報到備戰；佢就透過傳媒講，叫隊友唔好放棄，每場都拼盡搶分護級。咪話我求大俠潑冷水，早前列斯又有人腳變動，隊波士氣好有問題，唔係咁易踢番起，維杜卡要隊友搏盡，睇佢今個禮拜係咪身先士卒先。
蘇超聯球隊利雲斯頓雖然殺入咗蘇格蘭聯賽盃決賽，但由於佢哋嘅財政狀況麻麻，就快要被清盤，於是班球員決定會唔收一分一毫踢決賽，將決賽嘅收益畀晒球會。我求大俠覺得球員嘅精神好可嘉，而且佢哋咁做除咗可以幫到球會外，話唔定自己亦可能憑決賽嘅表現俾大球會睇中呢！
查爾頓上季作客車路士輸一比四，賽後佢哋同英超聯賽會投訴，話車仔個場泥多過草，影響演出，搞到車仔罰咗七萬蚊港紙。車仔早前撬走柏加，查爾頓雖則袋咗成億四港紙，但條氣就唔係好順；今個禮拜日車仔會喺主場對查爾頓，於是就嗱嗱臨鋪過個場，費事對方輸波「賴地爛」。
入選NBA東岸明星隊嘅麥基迪同謝美恩奧尼爾，噚日宣布將會喺明星賽中每射入一球就捐一千美金畀慈善團體。呢個行動可以話一箭雙鵰，一來可以做善事，二來又可以奉旨獨食，叫其他隊友唔好同你爭波射，等你有機會攞多啲分，捐多啲錢，果然一石二鳥嘅絕世好橋！