楊千嬅前晚三十歲牛一，與任賢齊及方力申等到尖沙嘴出席電影《花好月圓》首映禮。大會安排壽包為千嬅慶祝，司儀森美竟不停叫千嬅開包，又叫小齊開包皮，大講不文笑話。
楊千嬅與任賢齊等前晚出席《花好月圓》首映，二人合巹交杯後，大會推出大壽包為千嬅慶祝三十歲生日，千嬅見壽包即大叫：「大過我個呀。」
因為壽包中藏有很多小壽包，千嬅要將大包𠝹開，其間司儀森美多次大叫：「千嬅，開包啦，叫千嬅快啲開包啦！」語帶不文，現場人士無不咧嘴而笑，可是千嬅卻儍儍說：「乜入面有小包咩？」森美續說：「搣開包皮呀，女仔都係唔識，搵個男仔啦，小齊嚟啦。」小齊隨即打開大壽包，千嬅便說：「係咪咁㗎，好尷尬喎。」
事後千嬅說：「乜嘢叫開包呀？」當她得悉不文意思便大叫：「唔係啩，講埋啲咁嘢，靠害呀？」小齊則說：「我以為國語先有講開包，不過大家唔好誤會啦，司儀都係直話直講，氣氛咁好就百無禁忌啦。」
千嬅又透露生日在排舞室度過，經理人黃柏高帶蛋糕往探班道賀，並送上名表作生日禮物，千嬅說：「好多朋友送lego同HarryPotter嘅嘢，方力申送畫畀我，鄭中基傳咗電話短訊寫happybirthday，但冇打畀我。」
問千嬅三十歲會否為未來擔心，她說：「冇得控制㗎，三十歲開始做番大人嘅嘢，唔可以再喪笑。」問她可緊張婚姻大事，千嬅說：「我對感情冇信心，只望有獎攞，𠵱家興遲婚，婚姻係束縛，我好驚㗎，同居我又唔會。」
採訪：魯萍 攝影：林德雄
