合和主席哥頓胡應湘噚日搵咗八方同埋幾個行家，走上去佢嘅摩天大廈頂樓，講吓灣仔起酒店嘅進展，席間提到佢老人家有份做理事嘅「香港發展論壇」。佢話首個論壇下周舉行，題目係「普選與福利的關係」，對此素有獨特見解的哥頓當然有份發言啦！另外，佢老人家到𠵱家為止，對論壇嘅貢獻只係交咗五十元入會費。
講番嗰project，哥頓話為咗釋除灣仔居民同埋議員嘅疑慮，佢花咗數月時間將過往二十多年嘅資料，同埋近期種種實地考察所得編輯成書，裏面仔細到堅尼地道有幾多棵樹，有幾多棵值得保留都有。呢本書重中英對照㖭！佢又主動提及要多謝《壹週刊》，令佢明白點解會有人突然反對呢個project。
哥頓又話，若果佢唔係喺灣仔出世，唔係灣仔大，一定唔會花咁多時間去游說各方接受個project，因為以佢嘅性格，晨早經已將塊地斬件起樓！佢話會喺今日起將四千本書分派畀灣仔居民及議員，二十號見區議會，二十八號再入紙城規會，好有信心今次應該可以「通過」。
（圖）胡應湘對計劃好有信心。
傳真︰2623-9278
電郵︰