魯爾形象一向係好老公、好爸爸，同太座更被視為模範夫妻；魯爾去年夏天隨皇馬到港，就算蒲夜總會啲人都只係佢想放鬆吓心情。點知，西班牙傳媒近期竟然爆出「金童」即將離婚！
魯爾同名模妻子辛絲雖然係名人，但作風低調，好少負面新聞報道；所以西班牙傳媒披露兩人近期開始分家產，準備正式離婚，都幾突然。據報道，離婚導火線係魯爾同辛絲都各自有婚外情，兩人要成功挽救呢段婚姻機會都好微。皇馬近一、兩年紅透世界球壇，估唔到會搞到陣中球星好似朗拿度同卡洛斯相繼離婚收場。不過，我求大俠最想知道，係魯爾如果正式離婚後，佢個招牌錫戒指入球慶祝方式，到時會轉過邊款呢？
國足日前喺熱身賽贏芬蘭二比一，入波重要係一對前鋒張玉寧同郝海東，總算打破世界盃之後嘅入球荒悶局。阿里漢賽後話，中國要贏，球員就要放鬆心情，大膽去攻先有收穫；我求大俠都贊成，對手派二線兵，要趁機練進攻，唔好驚輸，星期六再戰芬蘭，希望有大比數戰果！
今年夏天將參加雅典奧運嘅美國夢幻六隊球員，好可能會入住豪華郵輪，而唔入住奧運選手村。其實，夢幻隊班球星每次都寧願自掏腰包入住豪華酒店，都唔想入住「簡陋」嘅選手村；但係奧運係代表國家比賽，班巨星係唔係應該同其他人一齊入住選手村，體驗一吓奧運精神呢。
英超球隊查爾頓嘅理財能力真係一流，啱啱至賣走柏加去車路士，袋咗一千萬鎊轉會費；然後喺佢哋球會青年軍出身嘅迪科，由韋斯咸轉會熱刺，令佢哋又收得轉會費當中一成多作為培育費，都有成一百萬鎊㗎！最好嘢係呢間倫敦球會一向唔大使，收咗呢成億港紙又夠有排用囉。
葡萄牙球會賓菲加喺今個月底慶祝創會百周年，據報道皇馬及曼聯將會前往「賀壽」踢表演賽，重有另一意甲球會有待落實。雖然𠵱家葡萄牙球會喺歐洲盃賽惡唔出樣，但當年都橫掃過歐洲一段時間，連有普斯卡斯及迪史堤芬奴同場上陣嘅皇馬都唔夠佢哋踢，絕對有地位㗎！