禽流感魔影逐步殺埋身，元朗突然出現神秘死雞事件，啲雞懷疑死於甘保羅症，專家話，即是禽流感熱身，做完畫頭，正畫即將登場。
世衞組織警告，連雞蛋都可能有禽流感病毒。由於香港嘅雞蛋，七成幾由大陸入口，因此特區政府必須禁埋大陸雞蛋，改以美國蛋頂上。美國蛋營養豐富，令兒童快高長大，食美國蛋，飲可口可樂，睇荷李活片，講美式英語，全港市民共同努力，實行生活美國化一條龍！
明日街市即將恢復活雞供應，今日會清洗街市先。防禽流感，已經全球吹晒雞，董班子都重係軟弱無能，唔敢撥款收購晒啲雞鴨銷毀，照樣畀雞鴨喺鬧市出現，任由啲雞禽販照樣狂吹雞屁股、生割雞頸，一片核突血腥。由今日起，若然有一單禽流感畸屎，證實係由街市雞鴨檔傳染嘅，董班子必須負起全部罪責，廢董必須落台。
親中挺董分子，對社會學一知半解，亂拋名詞，成日狂吠話呢個社會「民粹主義」抬頭，搞到廢董難以「行政主導」。禽流感殺到，本來眼前就有一個黃金機會，畀董班子表演吓乜嘢叫行政主導──一、即時禁絕大陸雞鴨及蛋類入口；二、即時向雞禽販收購晒所有本地飼養嘅雞鴨鵝，向雞禽販即時賠償，協助佢哋放下屠刀，洗清殺生冤孽，提供就業再培訓；三、即時立例，嚴刑打擊所有雞禽走私活動；四、即時立例，嚴懲民間「劏雞還神」及社團收𡃁斬雞頭儀式，提倡「拜神唔見雞」文明公民運動，廢除中國農民社會人雞共處嘅千年惡習；五、迫令中央人民政府及廣東省衞生廳，每日向六百萬香港市民滙報大陸最新禽流感疫情，如發現首宗人傳人個案，即時宣布暫停「自由行」。
三日之內，做齊以上「防瘟五部曲」，呢個廢柴政府，先至有資格講「行政主導」。如有雞禽販抬住啲雞籠雞鴨，大吵大鬧，走去政府總部示威，將啲生雞四圍亂掟，演變為台灣刁民式嘅騷亂，即時由警務處處長李明逵落柯打，武力清場。
廢董政府有冇咁嘅意志同本事？若果冇，任由雞禽販「業界」嘈喧巴閉，任由街市恢復賣活雞，咁又點怪得全香港都「民粹」高漲？係你自己軟弱怕事，放棄果斷施政嘅行政權力，又點怪得全港六百萬人，將呢個政府當做盂蘭節準備燒落地府嘅一堆紙祭品？
傳真︰2623-9278
電郵︰