向來備受用家追捧嘅平治C-Class，自新一代型號於2000年5月正式登場以來，一直成為車迷追捧對象；然而，廠方最近宣布會為其推出新版本，並加入多項新配備，務求令其變得更具吸引力。
從外形而言，無論係房車、旅行車抑或係SportsCoupe型號，都會換裝上全新嘅頭泵把、鬼面罩及頭燈等等，從而令賣相變得更見醒目吸引；16吋合金胎軨配205/55R16闊輪胎組合，亦會成為新車嘅標準裝備，而且重有最新嘅ConcerningLightSystem，以增強晚間行車安全性㖭！至於車廂方面，廠方特別為新車安排有經過改良嘅座椅、表板鋪排等等外，另外重會加入全新Thermatic恒溫冷氣系統，務求給予車上乘客有一個舒適嘅乘車環境呢！
另外，廠方將會為新C-Class嘅房車及旅行車型號，加入原本只在SportsCoupe版本出現嘅C230Kompressor型號，馬力輸出為192匹；與此同時，廠方又會為新C-Class推出走高性能路線、並擁有367匹馬力及52.0kgm扭力輸出嘅C55AMG型號，以迎合不同用家需要。未知身在香港嘅車迷，何時能與之見面呢？