股市好景時，證券行花紅，好多有十八個月糧。𠵱家地產代理行都唔輸蝕，隨時可以有一年。
經中原收購後，利嘉閣第一年賺錢，中原主席施永青前日話，若果利記今年賺到一億，就向全體後勤員工發放十個月花紅，連同例行及特別花紅，分分鐘一年有十二個月糧。咁計法，等於個個月都出雙糧。
施老闆當晚已經將首季特別花紅，由三分一個月，加碼到半個月。
點解施老闆定嘅賺錢目標係一億，原來中記收購利記，到𠵱家總共就係使咗咁多。
不過，若果今年做唔到一億，累計到明年達到目標，都可以有五個月花紅，第三年至做到就得番三個月。
利記上個月做到四千八百萬數，估計利潤有千零萬。
今日元宵佳節，即係中國情人節。中原噚日聯同信和集團，搞咗個應節記者會，宣傳將軍澳蔚藍灣畔。
中原一姐（劉瑛琳）同信和Mark哥（韓家輝洋名），齊齊搓湯圓。起初兩個都搓得似模似樣，不過，搓搓吓，Mark哥竟然將啲湯圓搓到成個餃子咁款，認真夠創意。
後來，佢哋重將啲湯圓煮熟，全部脹到成個拳頭咁大。
噚日適逢係立春，所謂一元復始、萬象更新，係播種時機。所以即日起至下周日，經中原地產安排參觀蔚藍灣畔，都可獲贈盆栽種籽一包。
內地客購物出手豪氣，買樓就重誇張。
世紀21拍賣部高級經理蔡漢陞話，公司原定喺銀主拍賣會，推出嘅大埔新峰花園單位，拍賣前俾個上海客用二百三萬買咗，呢個客跟手攞住一大叠人民幣去換港紙，再兌換本票，畀一成首期。
聽講個買家重冇諗住做按揭㖭。
單位係三期二十座低層，六七三呎。
聽蔡漢陞講，呢個客喺上海做地產，好多時去拍賣場執銀主貨。舊年曾經落嚟香港，用七十萬買咗個旺角寫字樓單位，都冇做按揭。
佢今次係趁嚟港旅遊期間入貨。據聞，佢都好熟悉本港買樓流程，唯一係冇支票，次次要畀真銀。
中小型發展商健聯發展，早排以三千五百幾萬，買入灣仔駱克道三八四至三八八號商舖。
本身兼營建材賣買嘅健聯，見到建材市道復甦，決定將上址改成本港首個專賣建材產品商場。
個場六千四百呎，地下二千呎，閣樓一樓各二千二呎。
負責商場租務嘅華滙物業透露，初步計劃將商場間細，每個舖位五百呎以內，租金未定。
經過沙士一役，大家明顯較以前更加注重健康，對居住環境要求，也相對提高。
新地猴年首個新盤屯門聚康山莊，借勢請嚟AC尼爾森中國個案研究副董事李思倫，分析港人對健康嘅睇法。新地順勢宣傳自己個樓盤。
雖然報告冇提到聚康山莊，但發展商就話，樓盤屬中低密度，綠化率超過六成，屋苑四周種滿不同品種植物。
其中四棵榕樹，成十米高，更有一棵百歲連理樹，物業連圍欄都係由植物造成。
咁睇，就完全配合AC尼爾森嘅調查內容。
蘭西
電郵地址：
