聽一啲過氣人物講政治，冇法子唔啞然失笑；啲老人家成日想當年，重拋出鄧小平之言嚟嚇人，充份暴露佢（及佢嘅同路人）嘅思想不合邏輯，與大部份香港人完全脫節。
過氣人物引述鄧小平話，普選唔可以保證選到一啲愛國愛港人物治港。喂，選舉就係選舉，點可以保證選到邊一類人物出嚟？造馬都唔可以造到咁出面啩？「精英大師」就可以話未跑一千米就知道贏梗啫，叫隻馬跑千四米都要跑過至知，賽前唔敢話佢包贏。以香港啲所謂愛國愛港派所能派出參加競選嘅人物，如果派曾憲梓、黃宜弘一類人物出來參加特首普選，神仙先至可以保證佢哋包贏。有包贏嘅選舉就唔係選舉，而係委任，千祈唔好指鹿為馬。
與投資S講選舉，講到一肚氣，投資S話不如講笑話。佢一位老友物業管理Y最近戴上一隻黃寶石金戒指，鑲咗十五粒碎鑽石，光芒刺眼，物業Y要佢估值，投資S唔知真假，心諗點都值十萬八萬啩，點知謎底係港幣二百五十大元！因為黃寶石、碎鑽石、金戒指，全部係假嘢，只不過係破璃、假水晶、鍍金而已。物業Y去年沙士期間參加一啲九百九十八元泰國旅行團，到泰北金三角，喺一個掛上寮國旗嘅小島買嘅，特登用嚟整蠱啲老友。
左丁山話，戴假珠寶戒指唔會害人，無傷大雅，用頭髮製造豉油、用皮草垃圾製造糖果，混合灰硫酸，先至係禍及祖宗十八代，呢啲內地奸商值得判死刑。講講吓，忽然記得地產N嚟拜年，送我一盒好精美嘅朱古力，來自北京，已經食咗幾件。返到寫字樓，立即丟之哉。