近期就算禽流感風波愈吹愈大，但批股集資活動繼續一浪接一浪，繼前日工銀亞洲（349）批股後，噚日又輪到新海康（119），真係好似驚死蘇州過後冇艇搭咁款，完全無視大市氣氛明顯轉弱，兩股今日復牌，真係唔知表現會點？
經紀陳話，不單止未批股嘅想批股，就算批過股嘅都話想添食，好似班投資者真係好大胃口。上個月先至批完股嘅上海銘源（233），市場傳聞可能在短期內再搞批股。呢個消息，認真嚇小初一跳。
上海銘源上個月中，以先舊後新方式，每股作價55仙，配售1億股，集資淨額5340萬元，其中有成31球貨，由配售代理中信資本的關連基金坐住。
上海銘源批股之後，股價雖然唔見有突出表現，但始終冇跌破過配股價，噚日收0.62元，冇起跌。經紀陳話，如果隻股真係有意添食搞批股，估計點都要炒上一轉，先至會吸引到人注意。
慕容小初