真係世事無絕對，早陣子亞Mark曾經提及，富士香港代理今年新人事新作風，負責開新加坡及馬來西亞地區，日常富士汽車銷售同營運嘅GlennTan，會兼任埋香港嘅揸Fit人，點知農曆年過後會有突變，原本懸空咗嘅GeneralManager一職，突然有人空降出任；最教亞Mark大感愕然嘅，會係呢位新任富士G.M.是一位女士，都可算係香港車壇多年來所罕見。
及後，經亞Mark四出打探，原來呢位剛上任數天嘅富士新G.M.，名字係TammyTo，原來佢響本地車行亦甚有淵源㗎！皆因Tammy早年曾任職大昌MSC維修部嘅Marketing，及後又曾轉職至Trinity三聯租車公司，而近期則任職辰達永安租車部，負責高級轎車嘅租賃工作呢！相信日後富士有Tammy嘅扶助下，勢必有一番新景象呢！
據知，現時香港富士代理正密鑼緊鼓籌劃香港陳列室嘅裝修工程，以迎接遲吓正式抵埗嘅Impreza1.5公升新版。以其富動感嘅賣相，加上有同級車中操控超著嘅AWD恒式四驅裝置，呢款Impreza1.5型號若然售價響13萬上落的話，勢必掀起車壇一場追捧潮呢！