大市噚日走勢先高後低，恒指收市微跌3點，成交縮到只得157億元。由於美股周二市後交易轉弱，市場預期美股會出現較大幅調整，期指低水幅度亦因而擴大。
國企前日急升後，噚日又靜番，臨尾一分鐘，更有大行玩嘢，個別國企質到散晒，最明顯係鎮海煉化（1128），3點59分重造緊7.5元，但大行就響呢個時候發難，在一分鐘內連質30個價位，最低質到6.0元，收市時嘅買賣價係6.1元同6.15元，不過計平均價，收市價就嘜返7.05元，嗰一分鐘成交唔夠50萬股，大行究竟有何居心？其他如安徽海螺（914）同中石化（386），亦有類似場面出現。芬佬就認為有兩個可能，一個係程式沽盤；另一個就係基金唔想國企起住，質到你驚，再震多一次倉。個人就認為後者可能性較大。
江西銅業（358）尾段冇遭到轟炸，收4.375元，跌0.1元，前日急升後，回一回，好正常。由於國際銅價近期又再升過，紐約3月期銅報1.1685美元，創6年來新高。銅價升，對江銅最有利，又有大行準備調高江銅目標價，現時標普證券的目標價係5.85元，並預期其03年度（12月年結）及04年度的盈利分別大升225%及85%，給予「買入」評級。
03年度，江銅盈利估約5.25億元（港元計），每股盈利0.2元；04年度，盈利可達9.7億元，每股盈利0.37元，預測PE11.8倍，標普認為江銅的PE屬偏低，與國際同業的約20倍PE相比，極具吸引，而且，銅價上升的有利因素，仍未考慮在內。
江銅剛發表聲明，澄清暫時並無計劃配售H股，平息市場上不必要的揣測。不過，江銅為收購上游銅資源，為未來的盈利增長鋪路，對資金確有需求，有消息指江銅已委託一家中資大行研究發行可換股債券的可行性，相信可解決資金問題，日後若真的進行配股，相信股價亦不會偏離A股太遠，目前江銅A股價係8.52元人民幣。
另外，江銅亦已安排下周前往美國及歐洲，進行第2次路演，相信會吸引到新一批的基金進場。
郭兆誠