劉德華同加際娛樂互告單嘢，睇嚟有排拗。華仔前幾日接受訪問話唔知加際反告佢啲乜，點知噚日就即刻有傳媒報道話加際補充資料畀法庭，話要告華仔將海外演唱會主辦權簽咗畀佢哋，但又同第二間做，又話李安修未經加際同意，將華仔新碟《大人的情歌》嘅母帶交畀台灣EMI印唱片，要求申請禁制令。
華仔噚日重喺日本大阪做緊宣傳，暫時唔回應。不過佢經理人公司負責人李先生就向各大傳媒發放嚴正聲明，指摘加際方面欠債不還，又不停發放不實消息掩飾真相。
李先生又話佢哋一直只收到加際嘅「索債陳述書」，陳述書雖然唔可以向公眾傳閱，但佢哋話從來冇收過補充文件，懷疑報道嘅文件來源有問題，所以將件事交畀律師處理，到法庭就真假自有分曉。
華仔前晚同反町隆史喺東京有樂町一間戲院出席《全職殺手》宣傳，成間戲院千幾個座位爆滿，其中好多都係華仔fans，不斷用中文大叫佢個名，反町企喺側邊有型又有風度，大讚華仔好厲害。之後華仔漏夜搭十一個鐘新幹線去名古屋出席第三場首映，華仔第一次搭新幹線，一個人坐頭等，又冇其他乘客，好似佢包晒成架車咁，華仔話好新鮮喎。
趙文卓𠵱家喺上海拍緊台灣劇集《風雲2》，佢為咗證明自己拍文戲一樣掂，日前佢同黃奕拍談情戲時，就好情深款款咁望住對方。問佢對因拍劇而相戀的女友張丹露做過乜嘢浪漫嘅事，趙文卓笑住話：「太多，說出來會嚇死人，我倆都很瘋狂。」
譚詠麟（阿倫）做完《左麟右李演唱會》之後，噚日特登公開一件事，佢話日前收到兒童癌病基金寄咗一張千六蚊捐款收據畀佢，追問之下，先知佢送咗四張演唱會飛畀葉德嫻，對方將價值千六蚊嘅飛，以阿倫嘅名義做善事，阿倫話：「我覺得好感動，公開係想話畀大家知，做善事可以有好多方法。」
成龍前晚喺銅鑼灣舉行春茗，佢個仔陳祖明去咗雲南拍《千機變2》，成龍話個仔交晒畀老婆林鳳嬌去理，以後都唔再提個仔嘅事。至於祖明改番姓房，成龍由得個仔自己改，不過祖明個英文名Jaycee就係佢改，讀音襯番佢個JC個音，佢重話本來想幫個仔改名叫陳美生，不過成龍爸爸反對。
馮仁昭日前收到料，原來徐子淇日前接到倫敦經濟學院嘅收生通知，話佢已經獲取錄讀碩士課程。子淇日前喺電話訪問中話：「爹哋同媽咪都戥我開心。雖然𠵱家有學校收咗我，不過我都要努力。」問子淇會點慶祝，佢話：「呢排功課好忙，或者等考晒試，返香港先同家人一齊慶祝。」
服裝：PacinoWan
髮型：Phoebus（TetePrivatei）
