【本報訊】手指突然屈曲麻痹、感到痛楚、難以動彈，千萬不要自作聰明強行拉直，因這已可能患上「彈弓手」。專家解釋，「彈弓手」即韌帶發炎和筋腱勞損，若不讓關節休息，或會導致筋腱磨損及撕裂，引發腕管綜合症、網球肘等上肢肌肉筋骨勞損的疾病。 記者：張嘉雯
「手指嘅肌肉之間有啲纖維，筋腱會經常上上落落，會滑溜，如果經常做重複性動作，就可能會發炎。」香港理工大學康復治療系助理教授司徒佩玉解釋，所謂「彈弓手」其實是韌帶發炎，令筋腱變粗，「所以有啲病人隻手摸落去會有粒嘢，好似冷衫起毛粒咁，阻住啲筋滑溜。」
「根據人體功效學，可能係工具嘅柄過幼，阻住啲手指，或者surface（表面）太硬，令筋腱唔能夠自由移動。」司徒佩玉表示，小提琴家、鋼琴家、經常用電鑽的三行工人、用鑊鏟的廚師及「扭地拖」的主婦要特別注意，「最常見係買嘢嘅時候拎好多個膠袋，（手指）又唔郁，最好用一啲粗帶嘅袋。」
「最犀利係啲工程師同畫graphic嗰啲，可以八至十個鐘，不停係咁㩒mouse（滑鼠），佢哋畫嘅嘢好細微，要控制得好好，於是個個眼又差，手又差。」司徒佩玉解釋，手腕有八塊小骨，由韌帶配合控制，經常用滑鼠會令軟組織壓力增加。
她建議用滑鼠時，手指勿屈曲超過三十度，滑鼠的體積要適中，然而男女各有不同。同時，必須按時保持動作柔軟，肌肉放鬆；使用滑鼠墊也要注意，「啲手嘅筋腱其中一邊俾佢（滑鼠墊）壓住，會令手指都麻痹。」
司徒佩玉認為，香港人低估了問題的嚴重性，有些人在習慣痛楚後不加以理會，自行拉開，可能導致筋腱磨損、甚至撕裂，引發腕管綜合症、手部及前臂腱鞘炎、肱骨外上髁炎（網球肘）等上肢肌肉筋骨勞損。
「發現得早可以食消炎藥，幫助消炎同埋消腫。」司徒佩玉說，只要勞損部份得到適當休息，使用職業治療師設計手托，加上消炎藥及物理治療，即可痊愈。「輕則一星期，嚴重嘅大概需三至六星期，千祈唔好再喺愈合期間刺激佢，要畀佢休息。」否則或要注射類固醇或動手術。
她建議巿民每工作一小時，休息五分鐘，不時伸展手指，或以橡皮製造工具，可以隨時改變工具形狀，藉以配合體形。