立法會由噚日起會一連三日辯論老董個與民「休養生息」嘅施政報告，廢董六年敗港，不僅拒絕向港人致歉，反而要立法會向佢「致謝」。民主派當然唔會客客氣氣感謝佢，橫掂老董對政改一直龜縮，梗係要遺憾一番。咁重要嘅辯論，咪以為一定會好人齊，點知田北俊同丁午壽齊齊向立法會告假到六號，唔知去咗邊度逍遙，田少身邊嘅人話，佢一定會趕及周五返嚟，因為田少要就政改發表「重要講話」，叫八方到時細聽。
咁又係，冇聽眾好慘，好似代表飲食界嘅張宇人，佢噚日一企起身講嘢，財司唐英年就挽起個公事包走人，搞到肥仔張好冇癮，因為佢第一句演詞就係講紅酒，希望當住財爺面叫佢取消紅酒稅，等佢啲選民做多啲生意，納多啲稅，點知俾唐唐離席羞辱。
財爺新聞秘書事後話，有咁啱得咁巧，唐唐搭正四點半離開一陣，係因為要返辦公室「處理文件」，唔係特登離棄舊黨友，睇怕唐唐都要請張宇人飲番杯擺平。
傳真︰2623-9278
電郵︰