喺上月初假美國底特律舉行嘅北美國際車展（NorthAmericanInternationalAutoShow）上，日產汽車除展出一款名為Actic嘅概念車外，同場亦展出咗快將推出、並以北美市場為目標嘅全新InfinitiQX56豪華SUV，惹來不少車迷注視；新車不但外形極富豪邁氣派外，車廂及機械配搭亦見吸引。不如𠵱家一齊嚟睇吓，呢款車有何吸引力啦！
記者：鄭達基
無論係日本、香港，抑或係北美地區，用家對SUV嘅需求與日俱增，而各大車廠亦睇準呢個市場，紛紛推出多款新車，以迎合車迷要求，其中又以日產汽車最為積極，除有以年輕用家為針對目標嘅X-Trail外，最近又預備響北美市場推出走豪華SUV路線嘅InfinitiQX56。
呢款全新日產InfinitiQX56，身形不但與其他同在北美市場發售嘅SUV一樣，予人有點龐然巨物之感外，又見氣派十足；其中一對炯炯有神嘅HID頭燈，襯以闊大鬼面罩及四輪18吋合金胎軨組合，就最能將呢個特點展露出來。然而，車後一組直立式尾燈及高置煞車燈，皆用上LED設計，透光度比傳統燈泡來得更高，從而有助增強晚間行車安全性。
至於車廂方面，新車空間可謂極盡寬敞闊落，除可容納七至八名乘客外，以高級真皮鑲嵌嘅前後三排座椅，亦可予人乘坐妥貼舒適之感；遇有需要時更可將座椅覆摺放平，以增加載物容量，又或者方便搬運較長嘅物件㗎！
新車嘅配備亦見齊全，除恒溫冷氣連前後獨立送風外，另備有6碟CD連10個揚聲器嘅Bose高級音響，以DVD為平台嘅導航系統連7吋LCD顯示屏幕，以及2個12V電插座等等，用落方便又容易；另外用家更可選配一套多媒體系統，讓乘客可在沉悶嘅車程中，觀看DVD影碟來解悶呢！車內更備有多個安全氣袋連充氣簾幕組合，喺堅固車架結構及多套三點式安全帶配合下，假若不幸遇上意外，仍能為車上乘客帶來周全嘅保護。
廠方為要讓新車有更出色嘅性能表現，故特別為其安排一台容積達5.6公升嘅V8DOHC偈作動力核心，不但輸出充裕外，運轉時重有寧靜順滑嘅特性㖭！與此同時，由於接近90%嘅扭力，會喺引擎處於2500rpm時發出，故此令車子響行走一啲Off-road路段時，會有更出色嘅表現。
底盤結構方面，廠方則為其安排以前後雙搖臂作懸掛組合，另外重加入有VDC系統，同埋大口徑18吋輪胎組合，行車循迹性之高絕能予人十足信心，而用家更可選購後輪驅動或配以AWD恒式四驅系統嘅型號，以切合不同需要；然而，四輪透氣煞車碟匹配ABS、EBD及BA等系統，亦可有收放自如感呢！
日產InfinitiQX56規格
引擎：5600ccV8DOHC
馬力：315ps/4900rpm
扭力：53.9kgm/3600rpm
傳動：5前速自動波，恒式四驅
懸掛：（前）雙搖臂（後）雙搖臂
制動：（前）透氣碟（後）透氣碟（ABS）
輪胎：265/70R18
尺碼：5255×2002×1999mm
軸距：3129mm
