𠵱家已經踏入數碼年代，DVD普及程度已幾乎可媲美CD，話大部份家庭已經擁有一部DVD機絕對唔誇張，不過唔少廠商正為咗呢個問題而頭痛，事關如何突出自己產品確唔係易事，以小記話，最簡單方法，梗係提供特別或獨有功能，好似Shinco新推出嘅DVP?15，就支援MPEG4格式影片播放，兼且可玩埋卡拉OK，價錢又經濟，開價$898，夠抵玩！。
記者：許福合 攝影：楊錦文 ImageGirl：Patsy
走一趟電器舖，就知道DVD機有唔少選擇，用家選擇時要着重功能外，讀碟流暢亦相當重要，ShincoDVD機一向喺讀碟性能方面做得唔錯，最新嘅DVP-315價錢抵玩，想自建家庭私人影院，可以考慮。
MPEG4格式影片唔少用家都聽過或者睇過，可以透過軟件，幾個步驟就可以將套電影壓縮減磅，直接用燒碟機燒進CD或DVD內，若果使用DVD碟，因為容量較高，放多幾套都得。DVP-315最大賣點，就係直接支援MPEG4播放，唔使再花幾個鐘時間預先將影片Encode，即刻有得睇！另外，現時部份新DV或DC，已經可以直接攝錄MPEG4影片，要喺電視欣賞更係省時省力。
DVD機除咗作為影音器材，放喺屋企，賣相都好重要，DVP-315外形都算不俗，銀色機身，輕巧纖薄，最正係使用鏡面面板，淨係外形都高檔咗唔少。而且機身更用上至型嘅Slot-in食碟式設計，唔使等碟盤伸出伸入，心急睇戲一定無揀錯。DVP-315除咗MPEG4外，更支援VCD、SVCD及DVD，播放時更可享受到逐行掃描帶來嘅高畫質，功能齊全。
聲音方面，DVP-315亦算合乎標準，用家可選擇經光纖或同軸線接駁擴音機，睇DVD時就可享受到5.1多聲道效果，不過較高檔嘅如DTS等就並未提供，對要求最高嘅玩家就必定滿意，不過若果鍾意一展歌喉，DVP-315就多一個賣點，內置卡拉OK，獨唱合唱都無問題，而且重可以個別調校Echo輸出，唱起嚟更有現場感。各位可能留意到機上按鈕不多，要揀歌跳歌就要用番跟機嘅遙控，就算唱到興起都唔使走來走去咁麻煩喇！
至於機背插頭亦一啲都唔偷懶，除色差、S-Video及傳統AV頭外，音效方面亦不弱，有齊光纖（Optical）及同軸（Coaxial）輸出至擴音機，作5.1環迴播放，最正係機背另有分開式環迴輸出插頭，重低音、中置、前後左右聲道等都可直駁喇叭輸出，即係唔一定要駁擴音機，都可享受豐富嘅音場包圍感。
MPEG4格式自1997發表至令，已成為國際標準，這個以技術為出發點、不同於MPEG1、2的影像格式，近期使用愈來愈廣泛，手機、數碼器材以至DVD機都開始支援。配合特別編碼如DivX，可將一套DVD壓縮進2張CD耎內！而畫質仍極佳，用家只需具備CD耎OM亦可享受到接近DVD影片效果。有喺電腦上睇過MPEG4影片，都知道質素比DVD略有不及，但比VCD好得多，DVP?15情況相似，但流暢度較高，播片比較暢順，但畫面較暗位置明顯有失真情況。
查詢電話：23437775