港股調整深化，恒指大跌289點，企於萬三關口。今個升浪，由去年4月25日的8332起步，到今年1月27日的高位13781，共升5449點，以調整升幅的0.236，可見12495。由於呢個升市係由資金推動，更深層調整的可能性不大，芬佬更認為恒指長期上升軌在12700，此位亦係50日線所在，應該守得住。
大市急升後，調整係好正常，借禽流感令人心裏虛怯的消息整固一下，後市升勢會更為健康。港股連升10個月，調整後再上，估計會再有兩至3個月的好市，之後才會出現一次中期調整。同芬佬傾開，佢哋仍然好有信心，話跌市係低吸機會。
德信科技（1228）收0.31元，微跌1個位，承接力甚強，此類高增長的工業股，隨時會破位而上。另外，遠東發展（035）同滙漢（214）都好強勢，前者全日有大行主動掃貨，成交3200多萬股，起碼買咗7成，只要大市轉穩，相信遠展股價好快會見2字頭。至於滙漢，除減持泛海（129）外，聽聞短期內重密密有動作，此股資產淨值14.25元，股價仍大折讓77.8%，現水平整固後再上，以量度升幅計，目標指向4.2元。
俊和（711）係另一隻要留意嘅股票。美聯物業（1200）自增持至超過5%後，更兩度在市場吸納，噚日最新消息，喺上月28日再購入579萬股（場內平均價1.2元），令持股量上升到5471萬股，佔發行股數7.55%；另外，ValuePartners亦持5.08%。
美聯大手增持的股份，成價由0.98元至1.2元不等。由於大市調整，俊和股價由近期高位1.31元大幅回落，噚日收1.06元，跌10.9%，美聯既在俊和升到1.2元水平仍增持，對俊和前景確實好有信心，則在1.1元以下的俊和，實在好吸引。
俊和發展中的有彩虹地鐵站上蓋住宅項目，包括320個住宅單位，樓面22萬方呎，以及10萬方呎的商場及停車場，預期第2季發售，估計可為集團帶來9至10億元利潤，單係呢個項目，每股俊和已可賺1.38元！手上重有80億元的建築合約同收租物業。
郭兆誠