真係服咗英超聯球隊保頓嘅領隊艾拿迪斯，佢簽人愈嚟愈騎呢，啱啱簽咗危地馬拉比沙路斯冇耐，日前又借用德國前鋒贊卡至季尾。贊卡雖然身形高大，不過喺意甲烏甸尼斯嘅十八個月期間，打咗三十三場都只係入咗兩球，俾人笑都笑到面黃；不過，艾拿迪斯就好有信心話會將佢好似西班牙球員甘普咁起死回生。
我求大俠並唔係質疑艾拿迪斯嘅功力，不過，佢之前都無法令巴西前鋒查度「回春」，而且贊卡腳法麻麻，得高空波一瓣；偏偏保頓嘅踢法就係鍾意打地波滲入，似乎唔係好啱贊卡踢噃！
有口痕友就話，其實艾拿迪斯借用贊卡可能係情意結，因為原來喺兩年前佢已向贊卡招手，不過就俾贊卡拒絕咗，所以今次幾大都要借用呢個德國前鋒。
錫耶納前晚就慘吞強隊國際米蘭四蛋，原本係好正常賽果，最弊就係錫耶納搵季初借到列斯嘅巴西中堅洛基祖利亞坐鎮後防。我求大俠已經不下數次講，呢位巴西冠軍成員今非昔比，果然錫耶納連輸兩場之餘，日前重要遭逢今屆聯賽最大敗仗，怕且佢哋呢勻都係搵錯救兵！
國足今晚同星期六就會喺廣州、深圳，同芬蘭踢兩場友賽。芬蘭今次只係派二線球員壓場，教練梅連倫到華之後，好謙虛咁話目的係向中國隊學習。不過，帶隊團長講中國實力只係一般，二線都夠贏；以中國上次對馬其頓表現，我求大俠都唔敢講中國贏唔贏到，希望國足爭番啖氣！
足球唔係美國主流運動，但啱啱轉飯鑊到歐洲搵食嘅美國國腳都表現唔錯，除咗麥拜迪加盟英超富咸後，即刻喺上星期六嘅聯賽入波助球隊贏波外，加盟德甲聯球隊漢諾威嘅美國前鋒馬泰斯亦不遑多讓，喺星期日對漢堡嘅聯賽先開紀錄，結果協助球隊贏三比二，認真平靚正。
巫師○一年狀元加域布朗成日俾人話「渣」，不過近排佢「的起心肝」，連續三場「雙雙」；所以大家都期待佢噚日對住今年騎士嘅狀元勒邦占士時有好表現。點知布朗熱身時竟然黑到俾隊友打親個鼻，治理後雖然打到下半場，但就得四分，比起勒邦個人新高三十八分，真係差得遠！