禽流感搞到風聲鶴唳，好友呢鋪真正係雞毛鴨血。恒指是日微穿萬三關口，國企指數再散百點，早排市內充滿樂觀情緒，𠵱家忽然間冇晒。
國企指數最低見過4434，稍為跌穿50日線（目前在4454），跟住就反彈上4497收市。昨日建議吼國指跌穿50日線吸納嘅中企Call輪9317，在低見42.5仙後反彈上44仙收市，短線可望再彈高多少，但以目前氣氛而論，大貪不宜，切記有乜唔妥就要跳車。
熱門H股中國人壽（2628）昨日開始有備兌證掛牌，一嚟就4件，全部係Call輪。正股是日急挫5%，Call輪自然難有好表現。其實呢4件國壽輪，唔計特種嗰件9605，全部都幾貴，9603同9608都係8月2日到期，溢價為37%同34%；9616玩到8月尾，溢價更去到47%，雖然槓桿率有番咁上下，都係揸唔過。
和黃（013）是日大跌近4%，刺激和黃Put輪9088由5.6仙飛上9.3仙，大升66%，成為輪王。
9088係末日輪，下月8日屆滿，溢價9.9%，槓桿率67倍。呢件溢價高而壽命短，只可炒極短線，揸耐少少輸多過贏，正股稍為反彈或牛皮，溢價一縮，佢會跌得幾慘。
章盛