九龍玩到香港搭隧巴試衋3G

一個電訊新時代的誕生，3G終於都正式在香港登陸！號稱可以每秒384k傳輸速度嘅3G（相等於比56K上網快6倍左右），終可將夢寐以求嘅多媒體視像盡情於手機上顯現，尤其視像會議更係令人趨之若鶩，唔少人都想知究竟係咩一回事。今日就一於試盡佢，由九龍玩到香港，睇吓係令人驚喜定激氣！

記者、攝影：劉耀祥　ImageGirl：Joanne

測試1
視像會議電話　合格
視像電話可謂3G強勢主打功能之一，情況就好似大家喺屋企玩WebCam，不過就可以邊行街邊玩，以384Kbps速度計，玩視像的確綽綽有餘。而今次嘅終極測試，就係喺過海巴士上玩足近30分鐘視像會議，由九龍城經過紅磡海底隧道玩到過金鐘，而另一部3G機就位於觀塘嘅固定室內。將近30分鐘嘅行程，加埋喺顛簸嘅巴士上面，結果訊號一直都未斷過，不過間唔中會出現格仔及唔夾嘴形情況，所以整體嚟講都算合格。不過另一邊嘅報告就話出現格仔次數頗頻密，相信若果兩部機都身處固定地點，效果相信會好好多！

■目前「3」只提供NEC嘅c616手機，獨沽一味冇得揀。

打視像電話其實同普通電話冇分別，只要輸入對方電話號碼再按「視像」，就自動將影像及聲音連至對方手機。

整個連接時間需時約10秒，未接聽前仍未開始計算收費時間。須留意嘅就係手機屏幕右手方的三個綠色圓形，有三個圓形先算係身處3G網絡覆蓋之中。

經歷近半小時視像會議之後，用上厚電的c616已經用去一半電力。

測試2
3G轉2.5G即斷線　肥佬
好多人都知3G喺地下鐵度係收唔到，而「3」亦話會當3G手機收唔到3G網絡時，會自動跳回2.5G網絡（即係Orange），理論上當用家返回3G網絡覆蓋時，手機亦自動跳回3G網絡。不過於測試中，當手機進入3G盲點位（如地鐵隧道內），手機會有數秒鐘時間「真空」，即係3G及2.5G都冇，再等數秒之後就會顯示用上2.5G，過程時間雖可接受，不過最大問題係，當3G轉去2.5G時，不能繼續保持通話，一定會斷線，待手機置身於2.5G時，才可再打電話，極為不便。
另一個問題，當重新再進入3G覆蓋範圍時，理應會自動追蹤3G網絡，不過小記步出地鐵站之後，最短都要10分鐘先可以再進入3G網絡，最長就係幾個鐘都仍然重係維持2.5G網絡，要人手熄機再開機先有番3G。另外MMS亦相當奇怪，兩部3G機位於同一地方，試過都要等成幾個鐘頭先收到，而SMS就話咁快收到，MMS就要等好耐。

■SMS即時收到，相反MMS十分唔穩定，接收時間可長可短。

測試3
一段新聞斷幾次　尚可
高速數據傳送絕對係3G的優點，所以「3」當然唔會只提供視像會議咁簡單，更加將大量資訊節目全面影片化，以往於2.5G時代雖然都有短片下載（VideoStreaming），不過質素絕對係「有限公司」，加上GPRS收費昂貴及支援手機不多，於香港始終未成氣候。今次「3」利用3G將資訊影片化，有新聞、交通、天氣等十多樣項目。
而實際試用後都有發現出現斷線情況，甚至部份影片完全不能下載收睇，小記於下午4時左右於灣仔街頭，並非繁忙時間，要到晚上再試才可正常瀏覽影片。另一測試則於繁忙時間進行，時間為晚上7時左右，一段4分多鐘的新聞，每隔幾十秒就暫停，再等10秒左右才可繼續收睇，睇幾十秒又再暫停，如此反反覆覆情況出現多次，似乎效果仍然有待改善。

■圖中三個綠色圓圈就表示已經置身於3G網絡之中。

■當離開3G範圍，而未聯繫至2.5G之時，就會出現「真空」時間，乜G都冇。

■資訊服務選擇算得上好多，有新聞、交通、天氣等十多樣項目。

■當瀏覽途中會出現連接中斷的畫面，幸好情況並非太嚴重。

測試4
畫面質素　尚可
3G嘅速度的確比2.5G快，不過網絡勁是否代表部機都咁勁？睇睇個Spec，6萬5色彩芒、雙10萬像素鏡頭、解像度為240×176、19MB記憶體、MSDuo插槽及內置藍芽等，睇落都唔錯，不過睇真啲，鏡頭仍只係10萬像素，作為視像手機，10萬像素似乎唔係好夠玩，唔知起格情況係咪就係因為鏡頭像素問題所致？不過10萬像素既可以影相又可以拍片，市面上亦唔多見，而所拍相片及短片的質素亦比視像時所見的畫面差，有矇鬆及起格情況。而且c616在開啟程式時，可能會未將之前的程式關閉，用家須手動將程式關閉，先可以開啟其他程式。

■當開啟短片時，有時亦未能成功連接，竟然等數小時之後才可成功收睇。

■4分19秒的新聞每播幾十秒就要再等，吊癮之餘亦非常不便。

全程直擊！
東九龍到金鐘逐格睇

■10萬像素鏡頭效果一般，面部格仔頗勁。

■程式間中會有「打交」情況出現，要手動關閉程式。

土瓜灣：接駁成功！畫面穩定及聲音仍然同步。若只用手機中的喇叭對話，對方音量會較細聲。

紅隧九龍入口：訊號仍然穩定，但係畫面未及之前清晰，開始較為矇矓，接收對方話音就依然清楚。

紅隧中：畫面間中出現起格，而聲音亦有斷窒情況，雖仍顯示「收爆」，不過效果未及之前好。

紅隧香港出口：離開隧道畫面回復穩定，一切正常，聲音及畫面的情況與入隧道前無異。

灣仔：畫面有模糊情況，次數亦出現一至兩次，模糊畫面維持約一兩秒後回復正常。

金鐘：接收依然穩定，不過有少許爆格，畫面質素相比起九龍時較差。

3G機唔受其他台玩
現時所有經由「3」出機嘅3G機都有SIMLOCK，即係插其他2.5G網絡商嘅SIM卡入去係用唔到。不過唔使驚，「3」都會幫用家提供Unlock服務，之不過就要出機後再拎上台幫你解Lock。既然可以有得解Lock，點解唔解埋先賣畀人，要人行多轉？認真奇怪！

■3GSIM卡與2.5G的外形一樣，不過只適用於「3」的手機。

街頭直擊
毋懼接收問題
「對3G嘅服務幾有信心，而且佢𠵱家有好多嘢送，所以就想試吓佢，（驚唔驚地鐵接收唔好？）唔驚，因為我都好少搭地鐵。」不過小記就見到NIQ嘅袋內唔單止有兩嚿電，甚至連汽車充電器都有，果然係未雨綢繆。

NIQ(電訊業)

等埋朋友一齊玩
「覺得個月費都唔算貴，就算最貴個月費5百幾蚊都有4千幾分鐘，本來都考慮緊買唔買，不過𠵱家身邊未有朋友出，所以都係拎咗啲Catelog返去，搵埋啲朋友先一齊出機。」

林小姐
(家庭主婦)

＊括號內之數目為首兩個月額外優惠。
＊免費增值服務：來電顯示、來電等候、電話會議、防止擅用電話功能、留言信箱、漫遊預設來電轉駁及全套來電轉駁。
＊「3」只提供上台連3G手機套餐，兩者不可獨立購買，要享用3G，即最低消費$4,243。
＊NECc616單價$4,380，購買兩部或以上可獲每部$3,980優惠價。